Японы Ерөнхий сайд асан Абэ Шинзог 2022 онд буудан хөнөөсөн хэрэгт буруутгагдаж буй эрэгтэйд бүх насаар нь хорих ял оноохыг прокурорууд шаарджээ. 

Прокурорууд пүрэв гарагт Нара дүүргийн шүүхэд болсон 15 дахь шүүх хуралдааны үеэр Ямагами Тэцүяад хүн амины хэрэг болон бусад хэргээр ял оноохыг хүсжээ. Тэд уг гэмт хэрэг нь дайны дараах үед гарсан ноцтой бөгөөд урьд хожид байгаагүй хэрэг байсныг дурдаад, маш харгис хэрцгий, хорлонтой үйлдэл гэж тодорхойлсон байна.

Я.Тэцүяаг Японы баруун нутгийн Нара хотод сонгуулийн кампанит ажлын үеэр А.Шинзог гар хийцийн буугаар буудсан хэрэгт буруутгаж байгаа юм. Өдгөө 45 настай шүүгдэгч нь 10 дугаар сард шүүх хурал эхлэх үед өөрт нь тулгасан ялыг хүлээн зөвшөөрсөн байна.

Я.Тэцүяа шүүх хурлын үеэр хэлэхдээ, А.Шинзог улс төр болон “Эв нэгдлийн сүм” гэгддэг шашны бүлгийн хоорондын холбоо хамаарлын гол хүн гэж үздэг байсан тул түүнийг онилсон гэжээ. Түүний өмгөөлөгчдийн хэлснээр, Я.Тэцүяагийн ээж нь шашны бүлэгт их хэмжээний хандив өргөж, түүнийг бага байхаас нь хойш гэр бүлд нь ихээхэн асуудал үүсгэсэн байна.

Түүнд оноохоор төлөвлөж буй ял олны анхаарлыг татаж байна. Өмгөөлөгчдийн зүгээс Я.Тэцүяаг яллахдаа хүүхэд насандаа үзэж туулсан хүнд хэцүү нөхцөл байдлыг нь харгалзан үзэхийг хүсжээ. Гэвч пүрэв гаргийн хуралдааны үеэр прокурорууд шүүгдэгчийн бага нас хэрэгт маш бага нөлөө үзүүлсэн гэж мэдэгдсэн байна.

Я.Тэцүяа А.Шинзогийн араас буудсаныг прокурорууд дурдаад, түүний хийсэн гар буу нь үхэлд хүргэх аюултай байсан бөгөөд олон хүнийг гэмтээж болзошгүй гэдгийг онцолжээ. Түүнчлэн шүүгдэгч халдахаар онилсон хүнээ яагаад шашны бүлгийн удирдагч бус Абэ болгон өөрчилсөн шалтгаанаа тайлбарлаагүй гэсэн байна.

“2021 оны орчимд Абэг тус бүлэгтэй холбоотой байгууллагад илгээсэн видео зурвасыг үзсэнийхээ дараа Ерөнхий сайд асан руу дайраагүй нь логикийн алдаа болсон. Шүүгдэгч тус бүлгийн учруулсан хохирлыг олон нийтэд мэдүүлэхийн тулд Ерөнхий сайд асныг буудсан” гэж прокурорууд мэдэгджээ.

Прокурорууд ял оноохыг шаардахаас өмнө Абэгийн бэлэвсэн эхнэр Абэ Акиэ өмгөөлөгчөөрөө дамжуулан үзэл бодлоо илэрхийлсэн байна. Шүүх хурал дээр уншсан мэдэгдэлд Абэ Акиэ шүүгдэгчийг хийсэн зүйлийнхээ хариуцлагыг шударгаар хүлээж, нүглээ наминчлаасай гэж хүсэж байгаагаа хэлжээ.

Эх сурвалж: NHK