Европын орнуудын нисэх онгоцны буудлуудын ажилтнууд цалин бага байгааг эсэргүүцэн ажил хаяхаар төлөвлөсөн тухай “Euronews” суваг мэдээлжээ.

Ажилтнууд цалингаа нэмэгдүүлж, ажиллах нөхцөлөө сайжруулахыг шаардахын тулд жилийн хамгийн ачаалалтай үеүүдийн нэгийг сонгосон байна. 

Зарим ажил хаялтыг хэдэн сарын өмнөөс төлөвлөсөн байдаг бол заримыг нь хэдхэн хоног, бүр цагийн өмнө зарладаг. Тиймээс сүүлийн мөчид гарч болзошгүй өөрчлөлтөөс үүдэх хүндрэл, эмх замбараагүй байдлаас зайлсхийхийн тулд аялалд гарахаасаа өмнө мэдээллээ сайтар нягталж шалгахыг зөвлөжээ. 

Итали: Нисэх онгоцны буудлын ажилчид зохицуулалттай ажил хаялтад бэлтгэж байна

Арванхоёрдугаар сарын 17-нд Итали улсад газрын үйлчилгээний зарим ажилтан, агаарын тээврийн компанийн нисэх багийнхан болон агаарын хөдөлгөөний диспетчерүүд зохицуулалттай ажил хаялтад оролцоно. 

Ромын нисэх онгоцны буудалд агаарын хөдөлгөөнийг удирдах ажлыг хариуцдаг ENAV компанийн ажилтнууд, Италийн томоохон нисэх буудлуудад газрын үйлчилгээг гүйцэтгэдэг Assohandlers компанийн ажилтнууд, Ryanair, Wizz Air, easyJet зэрэг агаарын тээвийн компаниудын ажилтнууд, Италийн үндэсний тээвэрлэгч ITA Airways компанийн ажилтнууд, Vueling компани болон Air France, KLM компанийн газрын үйлчилгээний ажилтнууд дөрвөн цагийн ажил хаялтад оролцоно. 

Ажил хаялт 13:00-17:00 цагийн хооронд үргэлжлэх боловч өдрийн туршид нислэг саатах, Милан, Ром, Венец, Неаполь, Катания зэрэг хотуудын томоохон буудлуудад бүртгэлийн цэгүүд болон ачаа тээш авах хэсгүүдэд урт дараалал үүсэх зэрэг хүндрэл үүсэж магадгүй байна. 

Их Британи: Лондоны нисэх онгоцны буудлуудад Зул сарын баяраар ажил хаяхаар төлөвлөж байна

Арванхоёрдугаар сарын 19-22 болон 26-29-нд Лондоны Лутон нисэх онгоцны буудлын газрын үйлчилгээг хариуцсан easyJet компанийн ажилтнууд ажил хаялт зарлах тул бүртгэл, ачаа хүлээн авах явцад саатал үүсэж магадгүй байна. 

Мөн Лондоны Хитроу нисэх онгоцны буудал Зул сарын баярын үеэр үүсэж болзошгүй хүндрэлд бэлдэж байна. 12 дугаар сарын 22-24 болон 26-нд Scandinavian Airlines Services (SAS) компанийн онгоцны багийн ажилтнууд ажил хаях бөгөөд Копенхаген, Стогхолм, Осло зэрэг хот руу хийх нислэгүүд саатаж магадгүй байна. 

Unite үйлдвэрчний эвлэлийн холбооноос мэдээлснээр, ажилтнууд цалин бага байгааг эсэргүүцжээ. Тухайлбал, өндөр өртөгтэй Скандинавын нисэх буудлууд руу нисэхдээ хүнсний банк ашиглахаас өөр аргагүйд хүрч байгааг дурдсан байна. 

Испани: Ачаа тээшний үйлчилгээ үзүүлэгчдийн ажил хаялт саатал үүсгэж байна

Зуны улирлаас хойш Ryanair-ийн Испанийн газрын үйлчилгээ үзүүлэгч Azul Handling компанийн ажилчид ажлын нөхцөл, урамшуулал, ажлын байрны аюулгүй байдлын асуудлаар долоо хоног бүр ажил хаялт зохион байгуулж байна. 

Зуны улирлаас хойш Испанийн Ryanair компанийн газрын үйлчилгээ үзүүлэгч Azul Handling компанийн ажилтнууд ажлын нөхцлийг сайжруулах, урамшууллыг нэмэгдүүлэх, ажлын байрыг тогтворжуулахыг шаардан долоо хоногт нэг удаа ажил хаяж байна. 

12 дугаар сарын 31 хүртэл ажил хаялт лхагва, баасан, бямба, ням гаригуудад 05:00-09:00, 12:00-15:00 болон 21:00-00:00 цагийн хооронд үргэлжилнэ. 

Тиймээс Ryanair-ийн зорчигчид Аликанте, Барселона-Эль-Прат, Жирона, Ибица, Лансароте, Мадрид-Барахас, Малага, Пальма-де-Майорка, Сантьяго-де-Компостела, Севилья, Өмнөд-Тенерифе, Валенсиа хотуудын нисэх буудлуудад бүртгэл хийлгэх болон ачаа тээш авахад урт дараалал, саатал үүсэхийг анхаарахад илүүдэхгүй гэдгийг зөвлөжээ.