Хамгийн олон жуулчин хүлээн авдаг Парисын Луврын музейн ажилтнууд цалин хөлс, ажиллах нөхцөлийн асуудлаар даваа гаригт эхлүүлсэн ажил хаялтаа сунгах эсэхийг хэлэлцэж буй энэ үед тус музей лхагва гаригийн 08:00 цаг гэхэд хаалттай хэвээр байна. 

Энэ оны 10 дугаар сард гарсан үнэт эдлэлийн хулгай, мөн ус алдсанаас эртний номууд сүйдсэн зэрэг дэд бүтцийн асуудлууд гарсны дараа музейн ажилтнууд ажил хаялт зарлаад байгаа юм. Эдгээр хэрэг явдал нь музейн аюулгүй байдлыг хангахад гарсан цоорхойг илчилж, музейн нөхцөл байдал тааруу байгааг харуулсан байна.

Үйлдвэрчний эвлэлүүдийн зүгээс Луврын музейн ажилтнууд хэт их ажиллаж, менежмент тааруу байгааг мэдэгдэж, шинэ ажилтнуудыг ажилд авах, цалинг нэмэх, зардлын бүтцийг эргэн харах шаардлага тавьж байгаа ажээ. 

10 дугаар сард 88 сая еврогийн /103.14 сая ам.доллар/ үнэ бүхий үнэт эдлэл хулгайд алдагдсанаас хойш хүчтэй шүүмжлэлд өртөөд буй Луврын музейн захирал Лоренс де Карс лхагва гаригийн үдээс хойш Францын Сенатын гишүүдийн асуултад хариулах ёстой.

Тус музей зөвхөн мягмар гаригт амардаг.

Reuters