“Аватар” киноных нь гуравдугаар анги гарахаас хэдхэн хоногийн өмнө найруулагч Жеймс Кэмерон албан ёсоор тэрбумтнуудын эгнээнд нэгджээ. Түүний хөрөнгө 1.1 тэрбум ам.доллароор үнэлэгдэж байгаа тухай Forbes сэтгүүл мэдээлсэн байна. 

Ингэснээр өдгөө 71 настай тэрбээр Жорж Лукас, Стивен Спилберг, Питер Жексон, Тайлер Перри нарын дараа тэрбумтан болсон тав дахь хүн болж байна.

"Терминатор", "Харийнхан", "Титаник", "Аватар" кинонуудыг найруулсан Жеймс Кэмерон бол хөрөнгийнхөө ихэнхийг өөрийн бүтээсэн киноноос олсон цорын ганц найруулагч бөгөөд түүний кинонууд дэлхийн кино театруудаас нийт 9 орчим тэрбум ам.долларын орлого олжээ.

Кэмерон мөн "Титаник" (1997), "Аватар" (2009), "Аватар: Усны ертөнц" (2022) гэсэн гурван киногоороо дэлхийн кино театруудаас тус бүр нь 2 тэрбум ам.долларын орлого олсон цорын ганц найруулагч хэвээр байгаа билээ. "Аватар" кино нь одоо ч хамгийн их ашиг орлого олсон кинонуудыг тэргүүлсээр байгаа бөгөөд нийт орлого нь 2.9 тэрбум ам.долларт хүрсэн юм. Харин "Аватар: Усны ертөнц" кино нь 2.3 тэрбум ам.долларын орлогоор гуравдугаарт бичигдэж байна.

Forbes сэтгүүлийн тооцоолсноор, Камерон "Аватар: Гал ба үнс" киноноосоо хамгийн багадаа 200 сая ам.доллар олох төлөвтэй байна.

"Аватар" киноны гуравдугаар анги мөн 2025 онд хамгийн их орлого олох Холливудын кино болно гэж таамаглаж байгаа бөгөөд дэлхийн кино театруудаас 1 тэрбум долларын орлого олж магадгүй байна. Киноны үргэлжлэл болох хоёр ангийг 2029, 2031 онуудад гаргахаар төлөвлөжээ. 

Эх сурвалж: Forbes