Италийн хойд нутагт орших үндэсний цэцэрлэгт хүрээлэнгээс үлэг гүрвэлийн олон мянган мөр олджээ. Зарим мөрийн голч нь 40 см хүрч байгаа бөгөөд уг олдвор нь 210 орчим сая жилийн настай гэж эрдэмтэд үзэж байна.  

Мөрүүд зэрэгцээ эгнээнүүдэд байрласан бөгөөд олон мөр дээр хуруу, сарвууны ул мөр тод ялгарч харагдаж байгаа аж. Эдгээр мөрийг урт хүзүүтэй, жижиг толгойтой, хурц сарвуутай өвсөн тэжээлт үлэг гүрвэл болох прозауроподууд үлдээсэн гэж үзэж байна. 

“Амьдарч буй нутагтаа ийм гайхалтай, сэтгэл хөдөлгөсөн нээлтийг хийнэ гэж хэзээ ч бодож байгаагүй" хэмээн Миланы палеонтологич Кристиано Даль Сассо ярилаа.

Милан хотоос зүүн хойд зүгт орших Стельвио үндэсний цэцэрлэгт хүрээлэнгийн уулын энгэр дагуу хэдэн зуун метр үргэлжилсэн ер бусын мөрүүдийг гэрэл зураг сонирхогч Элио Феррераа өнгөрсөн оны есдүгээр сард анзаарч илрүүлжээ.

Триасын галавын үед буюу ойролцоогоор 250-201 сая жилийн өмнө уг газар нь тал газар байсан бөгөөд хожим нь Альпын нурууны нэг хэсэг болсон байна. “Энэ газар үнэхээр үлэг гүрвэлүүдээр дүүрэн байсан, энэ бол судалгаа шинжилгээний баялаг эрдэнэс юм” хэмээн Даль Сассо хэлжээ.

Түүний хэлснээр, үлэг гүрвэлүүд сүргээрээ явж байсныг харуулсан мөрүүд, мөн “илүү нарийн зан байдлыг харуулсан, жишээ нь, өөрсдийгөө хамгаалахын тулд амьтад тойрог үүсгэн цугларсан байж болохыг гэрчлэх мөрүүд байна. 

10 метр хүртэл урттай прозауроподууд хоёр хөлөөрөө явдаг байсан хэдий ч зарим газарт урд мөчний мөр олдсон нь тэд зогсоод урд мөчөө газарт тавьсан байж болохыг харуулжээ. 

Уг газрыг нээсэн гэрэл зурагчин Элио Делла Феррера хэлэхдээ "Энэхүү нээлт нь бид бүгдийг амьдарч буй газар орноо, эх  дэлхийгээ хангалттай мэддэггүй болохыг сануулна гэж найдаж байна" гэлээ.

Италийн Соёлын яамны хэвлэлийн мэдээнд дурдсанаар, энэ бүс нутагт хүрч очиход хэцүү бөгөөд явган аялах зам байхгүй тул дрон болон алсаас тандан судлах технологийг ашиглах ажээ.

Стельвио үндэсний цэцэрлэгт хүрээлэн нь Итали-Швейцарын хилийн ойролцоох Фраэле хөндийд, ирэх онд болох өвлийн олимпын наадмыг зохион байгуулах газруудаас холгүй оршдог байна.

"Түүх өөрөө дэлхийн спортын агуу үйл явдалд хүндэтгэл үзүүлэхийг хүссэн мэт, байгаль ба спортыг холбосон бэлгэдлээр өнгөрсөн ба одоо цагийг холбож байна" гэж Италийн Соёлын яамны төлөөлөгч хэллээ.

Эх сурвалж: BBC