Бүгд Найрамдах Узбекистан Улсын Сайдын Зөвлөлийн холбогдох тогтоолын дагуу хэрэгжиж буй “Living History” түүхэн киноны хөтөлбөрийн хүрээнд Бүгд Найрамдах Узбекистан Улсын Ташкент хотноо 2025 оны 12 дугаар сарын 15-17-нд “Living History” олон улсын кино форум, “Golden Humo” үндэсний кино шагнал гардуулах ёслол зохион байгууллаа.

“Living History” хөтөлбөр нь 2024 онд Узбекистан Улсын Ерөнхийлөгч Ш.Мирзиёевийн санаачилгаар 2024-2030 онд хэрэгжих түүхэн киноны үндэсний стратегийн хөтөлбөр бөгөөд үндэсний бахархлыг нэмэгдүүлэх, түүхэн мэдлэгийг залуу үед таниулж, өвлүүлэн үлдээх, “Гурав дахь сэргэн мандалтын” үзэл санааг дэмжих зорилготой юм.

Уг стратегийн хүрээнд зохион байгуулсан “Living History” олон улсын кино форум нь түүхэн сэдэвт уран сайхны, баримтат болон анимейшн киноны үйлдвэрлэлийн чиг хандлага, олон улсын туршлага солилцох, кино урлагийн салбар дахь хамтын ажиллагааг бэхжүүлэхэд чиглэж байна.

Форумд ОХУ, Япон, Франц, Турк, Монгол зэрэг 14 орны 40 гаруй албаны төлөөлөл оролцож хэлэлцүүлгийн хүрээнд Түүхэн сэдэвт уран сайхны кино үйлдвэрлэл, хамтарсан бүтээлийн жишээ, Түүх болон киноны харилцан хамаарал, Киноны санхүүжилт, түгээлтийн бодлого, Түүхийг анимейшн бүтээлээр дамжуулан хүргэх боломжийн талаар хэлэлцэв.

Форумын үеэр Бүгд Найрамдах Узбекистан Улсын Ерөнхийлөгч Монгол Улсад айлчлах үеэр бүтээсэн “Qardoshlar” богино хэмжээний баримтат киног танилцууллаа. Уг бүтээл нь Бүгд Найрамдах Узбекистан Улсын ард иргэдэд Монгол орны түүх, соёлын үнэт зүйлсийг таниулах зорилготой юм.

Түүнчлэн Кино урлагийн зөвлөлийн төлөөлөл Монгол Улс 2021 онд “Кино урлагийг дэмжих тухай хууль”-ийг баталж, уг хуулийн хүрээнд дотоодын болон гадаадын кино бүтээгчдийг дэмжих бодлогыг хэрэгжүүлж буйг танилцуулсан юм. Үүнд гадаадын кино бүтээгчдэд зориулсан буцаан олголтын хөтөлбөр, хамтарсан кино төслүүдийг дэмжих санхүүжилтийн боломжууд багтаж байна.