2026 оны тавдугаар сард Вена хотод болох “Eurovision” 70 дахь удаагийн хөгжмийн наадамд Израил зэрэг 35 улсын дуучид оролцоно гэж уралдааныг зохион байгуулагч Европын өргөн нэвтрүүлгийн холбоо (EBC) даваа гарагт мэдэгджээ.

Өнгөрсөн оны наадамд оролцоогүй Болгар, Румын, Молдова зэрэг улс "Eurovision”-2026”-д оролцоно гэж тус холбооны хэвлэлийн мэдээнд дурджээ. Харин үүнээс өмнө Нидерланд, Испани, Ирланд, Словени, Исланд улсууд оролцохгүй гэдгээ мэдэгдсэн байна.

Энэ удаагийн наадамд 35 улс оролцох бөгөөд Австри, Франц, Герман, Итали, Их Британи гэсэн таван улс 2026 оны 5 дугаар сарын 16-нд болох гранд финалд автоматаар шалгарсан байна. Харин бусад бүх улс 5 дугаар сарын 12, 14-нд болох хоёр хагас шигшээ шатны аль нэгэнд өрсөлдөж, шийдвэрлэх шатанд шалгарах эрхийн төлөө өрсөлдөнө. Хагас шигшээ тоглолтуудын сугалаа 2026 оны 1 дүгээр сарын 12-нд явагдана.

Арванхоёрдугаар сарын эхээр ЕВС-гийн Ерөнхий ассамблейн чуулганд оролцсон төлөөлөгчдийн олонх нь тэмцээнийг улс төрийн өнгө аяс багатай болгох зорилгоор зохион байгуулалтын дүрмийг өөрчлөхийг дэмжсэн байна. Үүний хүрээнд Израилын оролцооны асуудлыг хэлэлцэх асуудлуудын жагсаалтаас хассан бөгөөд ингэснээр Газын зурваст Палестины хэт давруу үзэлтнүүдийн ХАМАС хөдөлгөөний эсрэг цэргийн ажиллагаа явуулж буй Израил тус тэмцээнд оролцох эрхтэй болжээ.

Израил оролцох болсонтой холбоотойгоор Нидерланд, Испани, Ирланд, Словени улсуудын телевизүүд "Eurovision”-2026”-г бойкотлохоор шийдэж, удалгүй тэдэнтэй Исланд нэгдсэн байна. Харин Герман зэрэг зарим улс Израилыг тэмцээнд оруулахгүй тохиолдолд оролцохоос татгалзана гэдгээ мэдэгджээ. 

Эх сурвалж: DW