Вьетнам улс энэ онд гадаадын 21 сая жуулчин хүлээн авах төлөвтэй байгаа нь “COVID-19” цар тахлын дараа аялал жуулчлалын салбар эрчимтэй сэргэж байгааг харуулж байна гэж Соёлын яам мэдэгджээ.

Эргийн дагуух урт шугам, байгалийн өвөрмөц тогтоц, баялаг түүх соёлтой Вьетнам нь Зүүн Өмнөд Азийн орнуудаас жуулчдын хамгийн аялах дуртай газруудын нэг болоод байгаа юм.

Энэ оны 20 сая дахь жуулчныг хүлээн авсныг тохиолдуулан Фукуок арал дээр даваа гарагт ёслолын ажиллагаа зохион байгуулсан байна. Энэ онд гадаадын жуулчдын тоо 2019 онд буюу цар тахлын өмнө тогтоосон дээд амжилтаас /18 сая/ давж, өнгөрсөн оныхоос 19.3 хувиар өснө гэж Соёл, спорт, аялал жуулчлалын яамнаас мэдээлжээ.

Вьетнамын нийслэл Ханой хот энэ онд дэлхийн хамгийн их агаарын бохирдолтой хотуудын жагсаалтын нэгдүгээр байрт хэд хэдэн удаа бичигдэж, Хюэ, Хойан, Нячанг зэрэг жуулчдын очих дуртай хотууд үерийн гамшигт нэрвэгдсэн хэдий ч  жуулчдын тоо өссөн байна. 2021 онд Вьетнамд “COVID-19”-ийн улмаас тогтоосон хилийн хязгаарлалтын улмаас гадаадын 160 мянга хүрэхгүй жуулчин ирсэн нь орчин үеийн түүхэн дэх хамгийн доогуур үзүүлэлт болж байв.  

Үндэсний статистикийн газрын мэдээллээр, энэ оны эхний 11 сарын хугацаанд Хятадын иргэд гадаадын жуулчдын хамгийн их хувь буюу нийт жуулчдын дөрөвний нэгийг бүрдүүлсэн байна. Удаад нь Өмнөд Солонгос, Тайвань, АНУ, Япон улс бичигджээ. 

Эх сурвалж: Reuters