Хамгийн цөөндөө 8 сая хэрэглэгчтэй нийгмийн сүлжээний үйлчилгээ үзүүлэгчид ирэх оны нэгдүгээр сарын 1 гэхэд бүртгүүлсэн байх ёстой гэж Малайзын эрх баригчид даваа гарагт мэдэгджээ. 

Зүүн Өмнөд Азийн тус улсын Харилцаа холбоо, мультимедиа хариуцсан комиссоос мэдэгдсэнээр, энэхүү алхам нь өргөн хэмжээний үйлчилгээ үзүүлэгчид Малайзын хууль эрх зүйн зохицуулалтын хүрээнд үйл ажиллагаагаа явуулж буйг баталгаажуулах зорилготой ажээ. “Free Malaysia Today” мэдээллийн цахим хуудсанд мэдээлснээр, уг шийдвэр нь “WhatsApp”, “Telegram”, “Facebook”, “Instagram”, “TikTok”, “YouTube” зэрэг платформуудыг хамрах төлөвтэй байна.

“Энэхүү санаачилга нь бүх платформыг хэрэглэгчдийн аюулгүй байдал, ялангуяа хүүхэд, гэр бүлийг хамгаалах тал дээр илүү тодорхой хариуцлага хүлээх нөхцөлийг баталгаажуулна” гэж комиссын мэдэгдэлд дурджээ. Гэхдээ энэ нь тэдгээр үйлчилгээ үзүүлэгчдийн дэлхий даяар явуулж буй үйл ажиллагаанд саад учруулахгүй бөгөөд томоохон цахим платформуудыг зохицуулах олон улсын практиктай нийцэж байгааг онцолсон байна. 

Түүнчлэн өнгөрсөн сард Малайзын Харилцаа холбооны сайд Фахми Фадзил хэлэхдээ, тус улс 2026 оноос эхлэн 16-гаас доош насны хүүхдүүдэд нийгмийн сүлжээг хориглохоор төлөвлөж байгааг мэдэгджээ.

Эх сурвалж: Anadolu