Чилийн ерөнхийлөгчийн хоёр дахь шатны сонгуульд Бүгд найрамдах намаас нэр дэвшсэн Хосе Антонио Каст ялжээ. 

Тус улсын Сонгуулийн хорооноос мэдээлснээр, Каст саналын хуудсын 83 хувийг тоолсны дараах байдлаар 59 хувийн санал авчээ. Түүний гол өрсөлдөгч болох Чилийн Коммунист намын гишүүн, эрх баригч зүүний төвч эвслээс нэр дэвшсэн өдгөө 51 настай Жаннет Хара 41 хувийн санал авсан байна. Тэрбээр сонгуульд ялагдсанаа хүлээж, өрсөлдөгчдөө баяр хүргэжээ. 

Каст ерөнхийлөгчийн сонгуульд гурав дахь удаагаа өрсөлдсөний эцэст ялж байна. Сонгуулийн кампанит ажлынхаа үеэр тэрбээр гэмт хэрэг, хууль бус цагаачлалтай хатуу тэмцэхээ амлаж байв. 

Өдгөө 59 настай Хосе Антонио Каст нь 1973-1990 онд үргэлжилсэн Аугусто Пиночетийн дарангуйллын үеэс хойш Чилийн ерөнхийлөгчийн албан тушаалыг хаших хэт барууны үзэлт анхны улс төрч болж байна. Сантьяго хотод төрсөн тэрбээр хотынхоо Католик их сургуульд хуулийн чиглэлээр суралцсан бөгөөд улс төрд 30 гаруй жил зүтгэж байна.

АНУ-ын Төрийн нарийн бичгийн дарга Марко Рубио түүнд Чилийн Ерөнхийлөгчөөр сонгогдсонд баяр хүргэжээ. “Бүс нутгийн аюулгүй байдлыг бэхжүүлэх, хоёр улсын худалдааны харилцааг идэвхжүүлэх зорилгоор АНУ түүний засаг захиргаатай хамтран ажиллана гэж найдаж байна” хэмээн тэрбээр Х нийгмийн сүлжээнд бичсэн байна.

Үүний зэрэгцээ Аргентины Ерөнхийлөгч Хавьер Милей түүнийг илт давуу ялсанд “асар их баяр хөөр мэдэрсэн”-ээ мөн онцолжээ.

Сонгуулийн эхний шатанд найман нэр дэвшигч өрсөлдсөн бөгөөд 2012 оноос хойш анх удаа Чилийн сонгууль заавал санал өгөх хэлбэрээр явагдсан байна. Хосе Антонио Каст гуравдугаар сарын 11-нд үүрэгт ажилдаа орно.

Эх сурвалж: Kazinform