АНУ-ын Ерөнхийлөгч Дональд Трамп дэлхийн бусад хотуудад буй ялалтын нуман хаалгануудыг “бүгдийг нь бүх талаар давсан” хаалгыг Вашингтонд барина гэж ням гарагт Цагаан ордонд болсон Зул сарын хүлээн авалтын үеэр мэдэгджээ.
“Вашингтон бол дэлхийд томоохон ач холбогдолтой хот атлаа ялалтын хаалгагүй цорын ганц хот. Харин одоо баригдах нуман хаалга нь бусад бүх хаалгануудыг давна” гэж Д.Трамп хэлсэн байна.
АНУ-ын төрийн тэргүүн барихаар төлөвлөж байгаа хаалгаа Парисын Ялалтын хаалгатай төстэй байхыг дурдсаны зэрэгцээ “үнэн хэрэгтээ түүнээс бүх талаараа илүү” хэмээн хэлжээ.
Түүний хэлснээр, уг ялалтын нуман хаалгыг Линкольны дурсгалын цогцолборын эсрэг талд, Арлингтоны гүүрний нөгөө захад барихаар төлөвлөж байгаа аж.
Трамп өнгөрсөн аравдугаар сард АНУ-ын тусгаар тогтнолын 250 жилийн ойд зориулан ийм байгууламж босгох санаачилгаа анх зарлаж, жижигрүүлсэн загварыг үзүүлж байсан юм.
Эх сурвалж: TASS
