Токиогийн Үэно амьтны хүрээлэнгийн Шяо Шяо, Лей Лей гэдэг ихэр хулсны баавгайнуудыг ирэх оны нэгдүгээр сарын сүүлээр Хятад руу буцаах бөгөөд ингэснээр Япон хагас зууны дараа анх удаа амьтны хүрээлэндээ пандагүй болно гэж Kyodo агентлаг эх сурвалжуудыг эш татан мэдээлжээ. Хоёр улсын хооронд панда түрээслэх гэрээ хоёрдугаар сард дуусна. 

1972 онд хоёр улсын хооронд дипломат харилцаа тогтворжсоныг бэлгэдэн Хятадаас Японд анхны хос панда ирснээс хойш эдгээр амьтад япончуудыг баярлуулж, жуулчдыг татах үзмэрүүдийн нэг болж эдийн засагт ашиг тусаа өгсөн гэж тус агентлаг бичжээ. Эм панда Лэй Лэй болон түүний ах Шяо Шяо нь хос панда болох Шин Шин, Ли Ли нарын үр төл бөгөөд 2021 оны зургаадугаар сард төрсөн байна. Шин Шин, Ли Ли хоёрыг 2024 онд Хятад руу буцаажээ. Ширахама дахь Adventure World зугаа цэнгэлийн паркт түрээсэлж байсан өөр дөрвөн пандаг энэ оны зургадугаар сард Хятад руу буцаасан байна.

Хоёр талын харилцаа муудаад байгаа энэ үед Хятадаас хоёр улсын найрамдлын бэлгэ тэмдэг болгож дахин панда илгээх эсэх нь тодорхойгүй хэвээр байгааг Kyodo-гийн мэдээнд дурджээ. Өнгөрсөн сард Японы Ерөнхий сайд Такаичи Санаэгийн Тайванийн талаар хэлсэн үгэнд Бээжин эгдүүцсэнээс үүдэлтэй хурцадмал байдал үргэлжилсээр байгаа юм. 

Эх сурвалж: Kyodo