Өмнөд Солонгосын цагдаа нар Сөүл хот дахь болон нийслэлээс холгүй байрладаг Эв нэгдлийн сүмийн байрнуудад өнөөдрөөс нэгжлэг хийж эхэлсэн байна. Нийслэлээс зүүн хойд зүгт орших олон улсын төв байр гэгддэг сүрлэг ордонд мөн нэгжлэг хийх ажээ. 

Цагдаагийн ажилтнууд тус сүмийн 10 байршилд нэгжлэг хийнэ гэж сэтгүүлчдэд зурвасаар илгээсэн мэдэгдэлд дурджээ. “Yonhap” агентлагийн мэдээлснээр, энэхүү нэгжлэг нь шашны бүлгийн удирдагч Хан Хак Жатай холбоотой засгийн газрын зарим гишүүн, одоогийн болон өмнөх хууль тогтоогчдод хууль бус төлбөр өгсөн гэх мэдээлэлтэй холбоотой байна.

Далай тэнгис, загас агнуурын асуудал эрхэлсэн сайд өнгөрсөн долоо хоногт Ерөнхийлөгч Ли Жэ Мёны засгийн газрын үйл хэрэгт сэв суулгахгүй байх үүднээс албан тушаалаасаа огцорсон юм. Тэрбээр өөрийн худал хэмээн мэдэгдэж буй мэдээллүүдийг няцаахад анхаарлаа хандуулахын тулд огцорч байгаагаа мэдэгджээ.

Эв нэгдлийн сүмээс өнгөрсөн долоо хоногт гаргасан мэдэгдэлдээ сүмийн өмнөх албан тушаалтны гаргасан “зөрчлүүдэд” ямар ч холбоогүй гэсэн байна. Тус сүмийн удирдагч Хан Хак Жаг бизнесийн ашиг тусын тулд тэргүүн хатагтай асан Ким Кён Хид хахууль өгсөн хэргээр шүүх хурал үргэлжилж байгаа юм. Хан Хак Жагийн хувьд уг мэдээллийг үгүйсгэсээр иржээ.

Эх сурвалж: Reuters