“Walt Disney” компани “OpenAI”-тай гурван жилийн хугацаатай лицензийн гэрээ байгуулжээ. Түүнчлэн тус компани 1 тэрбум ам.долларыг хувьцаанд оруулахаар тохиролцсон бөгөөд нэмэлт хувьцаа худалдан авах эрхийг авах болно гэж “OpenAI” болон “Walt Disney”-н цахим хуудсуудад нийтэлсэн мэдэгдэлд дурдсан байна.
“OpenAI”-ийн мэдээлснээр, “Disney” нь “Sora” хиймэл оюунд зориулсан контентын анхны томоохон лицензийн түнш болно. Гэрээнд зааснаар, “Sora” нь хэрэглэгчийн хүсэлтээр “Disney”-н анимейшн студийн дүрүүдийг ашиглан видео үүсгэх боломжтой болно. Харин “Disney” эдгээр видеог өөрийн “Disney+” платформоор үзүүлэх эрхтэй. Үүнийг 2026 оны эхээр хэрэгжүүлж эхлэхээр төлөвлөжээ. Харин студийн жүжигчдийн дүр төрх, дуу хоолойг ашиглах асуудлыг гэрээнд тусгаагүй байна.
“Sora” нь Микки Маус, Үнсгэлжин, Симба, Лило ба Стич зэрэг “Disney”, “Marvel”, “Pixar”, “Star Wars”-ын 200 гаруй анимэйшн дүр ба зохиомол амьтдын санг ашиглах боломжтой болно гэж хэвлэлийн мэдээллүүдэд дурджээ. Контент үүсгэхдээ “Sora” нь мөн эдгээр анимейшнд ашигласан хувцас, хэрэгсэл, тээврийн хэрэгсэл, байршлуудыг ашиглах боломжтой.
“Disney мөн OpenAI-ийн томоохон хэрэглэгчдийн нэг болж, түүний API-г ашиглан Disney+ болон бусад платформууддаа зориулсан шинэ бүтээгдэхүүн, хэрэгсэл, боломжуудыг хөгжүүлнэ. Мөн ажилтнууддаа зориулж ChatGPT-г нэвтрүүлнэ” гэж “OpenAI”-ийн мэдэгдэлд дурдсан байна.
“Disney бол түүх өгүүлэх дэлхийн алтан стандарт бөгөөд Sora болон ChatGPT Images-ээр хүмүүст гайхалтай контент бүтээх, мэдрэх боломжийг олгохын тулд хамтран ажиллах гэж байгаадаа баяртай байна” гэж “OpenAI”-ийг хамтран үүсгэн байгуулагч, гүйцэтгэх захирал Сэм Альтман мэдэгджээ.
"Disney", "Universal Pictures" (Comcast корпорац эзэмшдэг), "Warner Bros." "Discovery Inc." зэрэг Холливудын томоохон студиудтай "OpenAI" хэдэн сарын турш хэлэлцээ хийсэн тухай "Bloomberg" агентлаг өнгөрсөн хоёрдугаар сард мэдээлж байв. Хэлэлцээний гол сэдэв нь "Sora"-гийн арилжааны болон бүтээлч боломжийн тухай байжээ. Гэхдээ студиуд "OpenAI" мэдээллийг нь хэрхэн ашиглах нь тодорхой бус, мөн 2023 онд хиймэл оюунтай холбоотой маргаанаас үүдсэн Холливудын ажил хаялтын дараа үйлдвэрчний эвлэлүүдийн дургүйцлыг төрүүлэхээс болгоомжилсон тул хамтран ажиллахыг эрмэлзсэн гэж "Bloomberg" -ийн мэдээнд дурдсан байна.
Эх сурвалж: Forbes
