Парисын Луврын музейд усан хоолой задарч, номын сангийн эртний Египетийн түүх, соёлын талаарх хэдэн зуун ховор сэтгүүлийг усанд норгосон хэрэг гарсан талаар Bloomberg мэдээлэв. Уг үйл явдал арваннэгдүгээр сарын сүүлчээр гарсан ч хохирлын хэмжээ нь одоо тодорхой болж байна.

Энэ нь Луврын музей богино хугацаанд хоёр дахь ноцтой асуудалтай учирч буй тохиолдол юм. Сарын өмнө тус музейгээс 88 сая еврогоор үнэлэгдсэн үнэт эдлэл өдрийн цагаар хулгайд алдагдсан билээ.

Музейн орлогч захирал Фрэнсис Стейнбокийн мэдээлснээр, усанд автаж гэмтсэн материалд XIX зууны сүүлч, ХХ зууны эхэн үеийн ховор хэвлэлүүд багтсан байна. Эдгээрийг сэргээн хатаасны дараа дахин үзмэрийн эргэлтэд оруулахаар төлөвлөжээ.

Ус алдалтын шалтгаан нь музейн нэг жигүүрийн дулаан, усан хангамжийн хоолойн даралт зохицуулагч кран санамсаргүй онгойсон явдал байсан байна. Уг хуучирсан системийг ирэх жил шинэчлэхээр төлөвлөсөн байжээ.

Эх сурвалж: Officelife