АНУ-ын Ерөнхийлөгч Дональд Трамп Украинд ерөнхийлөгчийн сонгуулийг зайлшгүй явуулах хэрэгтэй гэж мэдэгдсэний дараа Владимир Зеленский тодорхой нөхцөл бүрдвэл сонгууль явуулах боломжтой гэж мэдэгдэв.

“Би сонгуульд бэлэн байна” гэж тэрбээр мягмар гарагт украин болон гадаадын сэтгүүлчидтэй уулзах үеэр хэллээ. В.Зеленскийн хэлснээр, хэрэв Украинд санал хураалтын үеэр аюулгүй байдлын баталгаа олговол ерөнхийлөгчийн сонгуулийг ойрын 60-90 хоногт явуулах боломжтой. Тэрбээр аюулгүй байдлыг хангахад АНУ болон Европын түншүүдээс дэмжлэг хүссэн байна.

Сонгууль явуулах хоёр дахь нөхцөл бол “сонгууль явуулах хууль ёсны эрх зүйн үндэс бүрдүүлэх” явдал гэж тэрбээр онцолжээ. Энэ хүрээнд дайны байдал үргэлжилж буй нөхцөлд сонгуулийн тухай хуульд шаардлагатай өөрчлөлт оруулахыг Украины Дээд Радагийн гишүүдээс хүссэн гэж мэдэгдсэн байна.

Мягмар гарагт Дональд Трамп Украинд ерөнхийлөгчийн сонгууль явуулах цаг нь “аль хэдийнээ болсон”, тус улсын эрх баригчид дайныг сонгууль явуулахгүй байх шалтаг болгож байна гэж мэдэгджээ. “Украины ард түмэн энэ сонгуулийг хийх ёстой гэж бодож байна. Магадгүй Зеленский ялж ч мэднэ” хэмээн тэрбээр Politico-д ярилцлага өгөхдөө хэлсэн байна. Украинд дайны дараа сонгууль зохион байгуулах тухай заалтыг АНУ-ын Ерөнхийлөгчийн дэвшүүлсэн энхийн төлөвлөгөөнд тусгасан байжээ.

Одоо хэрэгжиж буй Украины хууль тогтоомжийн дагуу дайны байдлын үед сонгууль явуулахыг хориглодог. ОХУ-ын цэргүүд довтолсны дараа цэргийн онц байдал зарласан тул 2024 онд болох ёстой байсан Украины ерөнхийлөгчийн ээлжит сонгуулийг хойшлуулжээ. Кремль энэ нөхцөл байдлыг ашиглан В.Зеленскийг “хууль ёсны бус” гэж буруутгахыг хэдэнтээ оролдсон юм. 

Д.Трампын ерөнхийлөгчийн хоёр дахь бүрэн эрхийн хугацаа эхэлснээс хойш байлдааны ажиллагаа үргэлжилж буй хэдий ч сонгууль явуулах асуудлыг дахин ярьж эхэлжээ. Д.Трамп сонгууль явуулахыг уриалж байсан боловч ийм шийдвэр гаргах боломжгүй гэж Украины эрх баригчид удаа дараа мэдэгдэж байв. Тухайлбал, өнгөрсөн дөрөвдүгээр сард Дээд Рада ерөнхийлөгчийн сонгууль зохион байгуулах бэлтгэл ажил явагдаж байна гэсэн мэдээллийг няцаасан байна.

Эх сурвалж: DW