Украины Ерөнхийлөгч Владимир Зеленский даваа гарагт Их Британийн нийслэл Лондон хотноо Европын удирдагчидтай хэлэлцээ хийжээ. Тэрбээр АНУ-тай хамтран ажиллах нь Оростой байгуулахаар санал болгож буй энхийн хэлэлцээрт зайлшгүй шаардлагатай гэдгийг онцолсон байна. 

“Америкчуудгүйгээр бидний зохицуулж чадахгүй зарим нэг зүйл байгаа, мөн Европгүйгээр ч зохицуулж чадахгүй зүйлс байгаа тул бид зарим чухал шийдвэрийг гаргах шаардлагатай байна” гэж В.Зеленский хэлжээ. Их Британийн Ерөнхий сайд Кир Стармер В.Зеленскийг өргөөндөө угтан авч уулзсан бөгөөд Францын Ерөнхийлөгч Эммануэл Макрон, Германы Канцлер Фридрих Мерц нар мөн хэлэлцээнд оролцсон байна.

К.Стармер Европ Украиныг дэмжиж байгааг дахин нотоллоо. Их Британийн Ерөнхий сайд хэлэхдээ, "бидний баримталж ирсэн зарчмууд хэвээр байгаа, бид Украиныг дэмжиж байгаа бөгөөд хэрэв гал зогсоохоор болсон тохиолдолд энэ нь шударга байхын сацуу урт удаан хугацаанд үргэлжлэх ёстой хэмээн онцолсон байна. 

Талууд одоогоор уулзалтын талаар дэлгэрэнгүй мэдээлэл өгөөгүй байна. В.Зеленский нийгмийн сүлжээний хуудсаараа дамжуулан мэдэгдэхдээ, Европын удирдагчдад АНУ-ын төлөөлөгчидтэй хийсэн хэлэлцээ болон аюулгүй байдлын баталгаа зэрэг бусад асуудлын талаар мэдээлэл өгсөн гэв.

В.Зеленский өнгөрсөн бямба гарагт АНУ-ын тусгай элч төлөөлөгч Стив Уиткофф болон Ерөнхийлөгч Дональд Трампын хүргэн Жаред Кушнер нартай утсаар ярьсан юм. Тэд газар нутгийн асуудлыг хэлэлцсэн боловч Украин, Оросын хоорондох санал зөрөлдөөнийг багасгаж чадаагүй гэж хэвлэлүүд мэдээлж байна.

Эх сурвалж: NHK