ОХУ-ын Ерөнхийлөгч Владимир Путин, АНУ-ын Ерөнхийлөгч Дональд Трампын тусгай элч Стивен Уиткофф болон Цагаан ордны зөвлөх Жаред Кушнер нар Кремльд уулзжээ. Таван цаг үргэлжилсэн хэлэлцээний талаар хоёр тал мэдээллийг дэлгэрэнгүй нийтлэхгүй байхаар шийдсэнийг Ерөнхийлөгчийн туслах Юрий Ушаков мэдэгдэв.

Түүний хэлснээр, Путин уулзалтын үеэр “чухал улс төрийн дохио”-г Трампт дамжуулахыг хүссэн байна. Уулзалтаар АНУ-аас ирүүлсэн төлөвлөгөөний талаар ерөнхий түвшинд ярилцсан бөгөөд 27 заалттай баримттай танилцсан ч тодорхой хэлэлцүүлэг өрнүүлээгүй аж. Зарим томъёолол Оросын талд нийцэхгүй байгаа ч цаашид үргэлжлүүлэн ажиллахаа илэрхийлжээ.

Мөн талууд Украины асуудлыг зохицуулах, урт хугацааны энхийн төлөвлөгөө боловсруулах талаар байр сууриа солилцсон бөгөөд холбогдох хэлхээ холбоог туслахуудын түвшинд үргэлжлүүлэхээр тохирсон байна. Ерөнхийлөгч нарын дараагийн уулзалтын хугацаа хэлэлцээний явцаас шалтгаалах аж.

Америкийн төлөөлөгчид уулзалтын дараа Москва дахь Элчин сайдын яам руу буцаж, удалгүй Вашингтонд очиж уулзалтын үр дүнг Ерөнхийлөгч Трампт биечлэн танилцуулах төлөвтэй байна. Ушаковын хэлснээр Европын зарим байр суурь, тэдний үйлдлүүд уулзалтаар мөн хөндөгджээ.

Тэрбээр Жаред Кушнерын оролцоог үр дүнтэй байсныг онцолж, хэлэлцээнд идэвхтэй ажилласан гэж үнэлэв. Талууд Москва, Вашингтон хоёрын хамтын ажиллагааны боломж их байгааг тэмдэглэн, энэ чиглэлд ажиллах эрмэлзлээ илэрхийлсэн байна.