АНУ-ын Ерөнхийлөгч Дональд Трампын засаг захиргаа өөрсдийн ажлыг сурталчлахдаа дуу, зургийг нь ашиглаж байгааг Америкийн поп дуучин Сабрина Карпентер болон хүүхдүүдийн хайртай зохиолын дүр болох Франклин яст мэлхий зохиолын хэвлэн нийтлэгч компани зэмлэн буруушаажээ.

Тодруулбал, АНУ-ын Цагаачлал, гаалийн албаны ажилтнууд цагаачдыг саатуулж буйг харуулсан дүрс бичлэгтээ “Juno” дууг нь ашигласны хариуд С.Карпентер мягмар гарагт жиргэхдээ, уг дүрс бичлэгийг сөрөг, жигшүүртэй хэмээн тодорхойлоод, хүнлэг бус хөтөлбөртөө дэмжлэг авахын тулд намайг болон миний уран бүтээлийг бүү ашигла хэмээн бичсэн байна. Цагаан ордон уг дүрс бичлэгийн тайлбарт С.Карпентерийн “Та үүнийг туршиж үзсэн үү? Баяртай” гэсэн үгийг эш татжээ. 

Даваа гарагт мөн Франклин яст мэлхийн зохиолыг хэвлэн нийтлэгч “Kids Can Press” компанийн зүгээс Батлан​​​​ хамгаалахын сайд Пит Хегсетийн X хуудсандаа нийтэлсэн Франклин хөлөг онгоцнууд руу галт зэвсэг чиглүүлж буй зургийг буруушаасан байна. П.Хегсет уг зургийг “Франклин мансууруулах бодисын террористуудыг онилж байна” гэсэн гарчигтайгаар нийтэлжээ.

“Бид Франклины нэр болон дүрслэлийг доромжилсон агуулга, хүчирхийллийн шинжтэйгээр зөвшөөрөлгүй ашигласан, үнэт зүйлстэй шууд зөрчилдсөн аливаа үйлдлийг эрс зэмлэн буруушааж байна” гэж хэвлэлийн компани мэдэгдсэн байна.

Д.Трампын засаг захиргаа Карибын тэнгис болон Номхон далайн зүүн хэсэгт мансууруулах бодис тээвэрлэж явсан гэж буруутган хөлөг онгоцнууд руу олон удаа цохилт өгсөн юм. Есдүгээр сарын эхнээс хойш цохилтод өртөн 80 гаруй хүн амиа алджээ.

Д.Трампын засаг захиргаа дуу болон зохиогчийн эрх бүхий материалыг нь ашигласныг өмнө нь олон уран бүтээлч  эсэргүүцэж байсныг дурдвал, “ABBA”, Брюс Спрингстин, Оливиа Родриго, Рианна, Фил Коллинз, Фаррелл, Жон Фогерти, “Semisonic”, Нил Янг, Эдди Грант, “Panic! at Disco”, “R.E.M.”, “Guns N’ Roses”, Селин Дион, Бейонсе, Адель нар юм.

Эх сурвалж: AP