АНУ-ын Ерөнхийлөгч Дональд Трампын засаг захиргаа бага насны иргэддээ зориулж 1 000 ам.доллароор хуримтлалын хөрөнгө оруулалтын данс нээхээр шийдвэрлэжээ. 

Ингэснээр бага орлоготой гэр бүлийн хүүхдүүд насанд хүрэх үедээ өөрийн гэсэн хуримтлалтай болоход тусална гэж Д.Трамп Цагаан ордонд уг санаачилгыг танилцуулах үеэрээ мэдэгдсэн байна. 

Сангийн яам 2025-2028 оны хооронд төрсөн, эцэг эх эсвэл асран хамгаалагч нь хөтөлбөрт хамрагдах өргөдөл гаргасан бүх хүүхдүүдийн дансанд 1000 ам.доллар шилжүүлнэ гэж тэрбээр онцолжээ. "Трампын данс"-ыг  2026 оны долоодугаар сарын 4-нд буюу АНУ байгуулагдсаны 250 жилийн ойгоор нээх ажээ.

Хөтөлбөрийн нөхцлийн дагуу 2026 оны долоодугаар сараас эхлэн эцэг эх, гэр бүлийн гишүүд, ойр дотны хүмүүс, мөн буяны байгууллагууд хүүхдүүдийн хөрөнгө оруулалтын дансууд руу мөнгө шилжүүлэх боломжтой. Мөн эцэг эхийн ажил олгогчид хандив өргөж болно. “Трампын данс”-д орсон мөнгийг хөрөнгийн биржийн үндсэн индекст багтсан компаниудын үнэт цаасны сангуудад дахин хөрөнгө оруулах буюу хөрөнгө оруулалтын сангийн үнэт цаас болгон хөрвүүлнэ. 

Түүнчлэн Dell компанийг үүсгэн байгуулагч Майкл Делл болон түүний гэргий Сьюзан нар 2016-2024 онд төрсөн 25 сая хүүхэд бүрийн дансанд 250 ам.доллар шилжүүлэхийн тулд нийт 6.25 тэрбум ам.доллар хандивлана гэдгээ мэдэгджээ. Ийм “Трампын данс”-ыг эзэмшигчид нь жилд дунджаар 150 мянган ам.доллароос доош орлоготой өрхүүдийн хүүхдүүд байх ёстой. Деллийн гэр бүлийнхний тооцоолсноор, америк хүүхдүүдийн 80 хувь нь энэхүү шаардлагад нийцэх ажээ. Uber, Nvidia, T-Mobile, Charter Communications зэрэг олон улсын томоохон компаниуд хандивт нэгдэх сонирхолтой байгаагаа илэрхийлсэн байна.

“Трампын данс”-ыг эзэмшигчид 18 нас хүртлээ хуримтлалаа ашиглах эрхгүй. Насанд хүрсэн хойно дансуудыг ердийн тэтгэврийн хуримтлалын хөтөлбөрийн дансанд хөрвүүлэх аж.

Сангийн яамныхны тооцоолсноор, хэрэв дансуудад жил бүр дээд тал нь 5 000 ам.доллар хийвэл 18 нас хүрэхэд хуримтлалын хэмжээ хөрөнгө оруулалтын өгөөжөөс хамааран 191.5 мянгаас 676.4 мянган ам.долларт хүрэх боломжтой. Харин эзээмшигчид нь 28 нас хүртлээ хуримтлалаа зарцуулахгүй бол 600 мянгаас 1.9 сая хүртэлх ам.долларын хуримтлалтай болно. 

Эх сурвалж: TASS