Италийн тансаг зэрэглэлийн хувцас загварын “Prada” групп “Versace” брэндийг худалдан авснаа мягмар гарагт зарлалаа. Ингэснээр тус групп удаан хугацаанд хүсэж байсан үр дүндээ хүрчээ.
“Prada” групп АНУ-д төвтэй “Capri Holdings” компаниас “Versace”-г 1.3 тэрбум еврогоор /1.51 тэрбум ам.доллар/ худалдаж авах эцсийн гэрээнд энэ оны дөрөвдүгээр сард гарын үсэг зурсан юм. “Prada”-гийн эзэмшигчид болох Миучча Прада, Патризио Бертелли нарын хүү Лоренцо Бертелли 11 дүгээр сард “Reuters” агентлагт мэдээлэхдээ, интеграцчилал дууссаны дараа “Versace”-гийн гүйцэтгэх захирлаар томилогдоно гэдгээ хэлсэн байна. Түүний ярьснаар, “Prada” энэхүү хэлэлцээрийг хийхийг олон жилийн турш эрмэлзэж иржээ.
“COVID-19” цар тахлын үед бид хэдийн холбоо тогтоогоод байсан бөгөөд “Capri” болон “Tapestry”-гийн хэлэлцээрээс ч өмнө яриа хэлэлцээ хийж байсан. Монополийн эсрэг асуудлаас болж хэлэлцээр бүтэлгүйтсэний дараа бид энэхүү хэлэлцээнд эргэн анхаарч, холбогдох үйл явцыг түргэвчлэхийг хичээсэн. Энэ бол удаан хугацаанд үргэлжилсэн хүчин чармайлтын үр дүн юм” гэж Л.Бертелли ярьсан байна.
Ингэснээр 1978 онд Италийн Милан хотноо Жанни Версачегийн үүсгэн байгуулсан, зоримог шийдэл, тансаг гоо зүйгээрээ алдартай “Versace” брэнд нь тус группийн хоёр гол брэнд болох “Prada” болон түүнээс арай жижиг боловч хурдацтай өсөн дэвшиж буй “Miu Miu” брэндүүдийн эгнээнд нэгдэх бөгөөд энэ нь Италийн загварын салбарт стратегийн огцом өөрчлөлт гарч буйг илэрхийлж байна.
Энэхүү худалдан авалтыг ихээхэн дэмжиж байсан Бертелли хэлэхдээ, “Versace” хоёр гол нөхцөлийг хангасныг онцолсон нь санхүүгийн хувьд тийм ч их эрсдэлтэй бишээс гадна уг брэнд нь олон нийтэд танигдах тал дээр дэлхийд тэргүүлэгчдийн нэгд зүй ёсоор тооцогддог гэдгийг дурджээ.
“Prada”-тай хийсэн гэрээг зарлахаас хэдхэн долоо хоногийн өмнө буюу энэ оны гуравдугаар сард Донателла Версаче “Versace”-гийн креатив захирлын албан тушаалаасаа огцорсон юм. Тэрбээр уг албан тушаалыг гуч орчим жилийн турш хашсан билээ. Улмаар “Miu Miu”-гийн дизайн хариуцсан захирал асан Дарио Витале түүний халааг авчээ.
Эх сурвалж: CNN
