Украины дайныг зохицуулах асуудлаар ОХУ, АНУ-ын талуудын хэлэлцээ Кремльд боллоо. Уулзалт бараг таван цаг үргэлжилж, Москвагийн цагаар лхагва гаргийн 00:30 цагийн орчимд дууссан гэж Оросын мэдээллийн агентлагууд мэдээлэв.

Оросын талаас хэлэлцээнд Ерөнхийлөгч Владимир Путин, түүний туслах Юрий Ушаков, Оросын Ерөнхийлөгчийн тусгай төлөөлөгч Кирилл Дмитриев нар оролцсон бол АНУ-ыг Ерөнхийлөгчийн тусгай элч төлөөлөгч Стивен Уиткофф, Дональд Трампын хүргэн Жаред Кушнер нар төлөөлжээ. 

Кремльд болсон хэлэлцээгээр Украинд дайныг зогсоох хэд хэдэн хувилбарыг хэлэлцсэн гэж Оросын Ерөнхийлөгчийн туслах Ю.Ушаков уулзалтын дараа сэтгүүлчдэд мэдэгдсэн байна. Түүний хэлснээр, Оросын тал АНУ-ын анхны “энхийн төлөвлөгөөнөөс” гадна дөрвөн өөр баримт бичгийг хүлээн авчээ. В.Путин Вашингтоны зарим саналыг “шүүмжилж, түүгээр барахгүй хүлээн зөвшөөрөхгүй” байгаагаа илэрхийллээ гэж Ю.Ушаков онцлоод уулзалтын үеэр “газар нутгийн асуудлуудыг тодорхой” хэлэлцсэн гэдгийг дурдсан байна.

“Одоогоор харилцан буулт хийсэн, хоёр талд хүлээн зөвшөөрөгдөх шийдэл хараахан олдоогүй байна. Гэхдээ Америкийн зарим санаачилга харьцангуй хүлээн зөвшөөрч болохуйц харагдаж байгаа ч тэдгээрийг цаашид нарийвчлан хэлэлцэх шаардлагатай. Бидэнд санал болгосон манайд таарахгүй зарим томъёолол, заалтууд байгаа. Тиймээс ажил үргэлжилнэ” гэж Оросын Ерөнхийлөгчийн туслах хэлжээ. Гэсэн хэдий ч Ю.Ушаков хоёр талын уулзалтыг “тун өгөөжтэй, ихээхэн ач холбогдолтой” болсон гэж дүгнэлээ. Эдгээр хэлэлцээний дараа дайныг дуусгах боломж улам холдсон эсвэл ойртсон эсэх талаарх сэтгүүлчдийн асуултад хариулахдаа тэрбээр “Холдоогүй нь лав. Гэхдээ цаашид Вашингтон, Москва хоёрт хийх ажил их байна” гэж хэлэв.

Ю.Ушаковын хэлснээр, яриа хэлэлцээ “бүрэн хаалттай, нууц” горимоор явагдсан бөгөөд хэлэлцээний агуулгыг талууд дэлгэхгүй гэдгийг онцоллоо. АНУ-ын төлөөлөгчид Оросын Ерөнхийлөгчтэй хийсэн уулзалтын үр дүнгийн талаар эхлээд Ерөнхийлөгч Д.Трампад "биечлэн танилцуулсны дараа" Вашингтон дахин Москватай утсаар холбогдон яриа хэлэлцээг үргэлжлүүлэх төлөвтэй байна.

Украины Ерөнхийлөгч Владимир Зеленский Кремльд уулзалт болж байх үеэр Telegram хуудсандаа бичихдээ, дайныг зогсоох нөхцлийн талаар “амархан шийдэл” гарна гэж хүлээхгүй байгаагаа мэдэгдээд, АНУ-ын төлөөлөгчдийн Орост хийсэн хэлэлцээний талаарх мэдээллийг хүлээж байна гэжээ. “АНУ-ын төлөөлөгчид уулзалтаа дуусмагц хамгийн түрүүнд бидэнд мэдээлэхийг хүсэж байна. Тэдний өгсөн мэдээллээс бидний дараагийн алхам шалтгаална” гэж тэрбээр мэдэгдээд АНУ-ын төлөөлөгчидтэй, тэр дундаа Ерөнхийлөгч Трамптай удахгүй уулзана гэдгээ хэлсэн байна. 

Эх сурвалж: DW