Оксфордын англи хэлний толь бичгийг зохиогчид 2025 оны онцлох үгээр “rage bait” (орчуулбал "уур хилэнгийн өгөөш") гэсэн хэллэгийг сонгожээ.

Тус их сургуулийн "Oxford University Press" хэвлэлийн газраас тайлбарласнаар, уур бухимдлыг төрүүлэх зорилготой контентыг ингэж нэрлэдэг байна. Ийм контентууд нь сэтгэл гонсойлгох, өдөөн турхирах эсвэл доромжилсон агуулгатай байдаг бөгөөд ихэвчлэн вэб хуудсууд, нийгмийн сүлжээний хуудсуудад хандалтыг ихэсгэх зорилгоор нийтэлдэг ажээ. 

Сүүлийн гурван сард “rage bait”-ийг ашиглах нь гурван дахин ихэссэн гэдгийг их сургуулийн эрдэмтэд онцолсон байна. Анх 2002 онд энэ хэллэгийг жолоочийн хариу үйлдлийг тайлбарлахад хэрэглэж байжээ. Тодруулбал, нэг жолооч нөгөөдөө зам тавьж өгөхийг хүсэхдээ санаатайгаар бухимдал төрүүлэхийн тулд дуут дохиогоо дуугаргахыг ийм үгээр илэрхийлдэг байв.  Харин дараа нь интернэтийн хэллэг болж хувирсан байна.

Оны онцлох үгийг сонгох олон нийтийн санал хураалт гурван өдөр үргэлжилж, 30 мянга гаруй хүн оролцсон байна. “Rage bait”-ээс гадна, "aura farming", “biohack” гэсэн үгнүүдийг олон нийтийн санал асуулгад оруулжээ. 

"Aura farming" гэдэг нь хүн ямар нэг зүйлийг төдийлөн их хүчин чармайлт гаргахгүйгээр өөрийн гэсэн донжтой, уран гоёмсог байдлаар хийж, бусдын анхаарлыг татахыг илэрхийлдэг ажээ. Жишээ нь, Индонезын Дикхе хэмээх хүү завин дээр бүжиглэн дэлхий даяар алдартай болсонтой адил.  Энд “аура” гэдэг  үг нь эрч хүчийг илэрхийлж байгаа бол “farming”” нь эерэг энерги, өөртөө итгэлтэй, сэтгэл татам байдлыг цацруулж бусдын анхаарлыг татах, бахдал төрүүлэх чадварыг илтгэнэ. 

“Biohack”  гэдэг нь амьдралын хугацааг уртасгаж, амьдралыг чанарыг сайжруулах, биеийн болон оюуны чадавхыг нэмэгдүүлэх зорилготой төрөл бүрийн технологи, арга юм.

Эх сурвалж: TASS