Шри Ланкад үерийн гамшиг нүүрлэж, хөрс нурсны улмаас амиа алдсан хүний ​​тоо 56 болж, 600 гаруй байшин барилга эвдэрч сүйдээд байгаа энэ үед төрийн байгууллагууд, сургуулиудыг баасан гарагт түр хаажээ. 

Шри Ланкад өнгөрсөн долоо хоногоос гамшиг нүүрлэж эхэлсэн бөгөөд пүрэв гарагт хүчтэй аадар бороо орсны улмаас орон даяар байшин барилга, зам талбай үерт автаж, хөрс нурсан байна. Нийслэл Коломбо хотоос зүүн зүгт 300 орчим км зайд орших Бадулла, Нувара Элия зэрэг уулархаг, цай тариалдаг бүс нутгуудад хөрс нурсны улмаас 25 хүн амиа алджээ. Засгийн газрын Гамшгийн уршгийг арилгах төвийн мэдээлснээр, тэдгээр бүс нутагт 21 хүн сураггүй болж, 14 хүн гэмтэж бэртсэн байна.

Түүнчлэн улс даяар янз бүрийн газруудад хөрс нурсны улмаас хүмүүс амь эрсэджээ. Цаг агаарын нөхцөл байдал улам дордсон тул Засгийн газар баасан гарагт төрийн байгууллагууд, сургуулиудыг түр хаахаар шийдвэрлэсэн байна. Хүчтэй борооны улмаас ихэнх усан сан, гол мөрөн үерлэж, замууд хаагдсан байна. Зарим газарт үерт автсан зам, төмөр замын замууд дээр чулуу, шавар, мод унасан тул зорчигч тээврийн галт тэрэгнүүдийн хөдөлгөөнийг зогсоожээ.

Орон нутгийн телевизээр пүрэв гарагт үерт автсан байшингийн дээвэр дээрээс гурван хүнийг аварч буй агаарын цэргийн хүчний нисдэг тэрэг, мөн тэнгисийн цэргийн хүчин болон цагдаа нар оршин суугчдыг тээвэрлэхийн тулд завь ашиглаж байгааг харуулсан байна. Пүрэв гарагт гарсан дүрс бичлэгт мөн зүүн нутгийн Ампара суурингийн ойролцоо үерийн усанд машин урсаж, гурван зорчигч амиа алдсан талаар мэдээлжээ.

Эх сурвалж: AP