Европын Холбооны /ЕХ/ бус улсуудын үзэгчдэд худалдах тасалбарын үнийг нэмэгдүүлнэ гэж Парисын Луврын музей пүрэв гарагт мэдэгджээ. Ингэснээр АНУ, Их Британи, Хятад зэрэг орны жуулчид тус музейг үзэхийн тулд 37 ам.доллар төлнө гэсэн үг юм.

Музейгээс AFP агентлагт мэдээлснээр, тасалбарын үнийг 45 хувиар өсгөх нь дэлхийн хамгийн алдартай музейн бүтцийг сайжруулахын тулд жилийн орлогыг 23 сая хүртэлх ам.доллароор нэмэгдүүлэх зорилготой ажээ. Өнгөрсөн сард тус музейгээс үнэлж баршгүй үнэт эрдэнэсийг хулгайлсан хэрэг гарсан билээ.  

2026 оны нэгдүгээр сарын 14-нөөс эхлэн ЕХ, Исланд, Лихтенштейн, Норвегээс бусад орны иргэд 32 евро буюу нэмэлт 10 евро төлөх шаардлагатай болно гэж музейн удирдах зөвлөлийн хурлаар уг шийдвэрийг баталсны дараа музей болон ажилтнуудын үйлдвэрчний эвлэлээс мэдэгджээ.

Луврын музейн 2024 оны тайланд дурдсанаар, тухайн жилд 8.7 сая зочин хүлээн авсны 69 хувь нь гадаадын иргэд байжээ. Тэдний дотор америкчууд хамгийн их хувийг эзэлсэн бол хятад жуулчид гуравдугаарт бичигдсэн байна. Тасалбарын үнийг нэмэгдүүлэх шийдвэр нь “бүтцийн асуудлууд”-ыг шийдвэрлэхийн тулд жилд 20 сая хүртэлх еврогийн санхүүжилт босгох зорилготой гэдгийг музейн захиргаа дурджээ.

Энэ оны 10 дугаар сарын 19-нд бүлэг этгээдүүд Луврын музейд нэвтэрч, ердөө долоон минутын дотор 102 сая ам.долларын үнэ бүхий үнэт эдлэл хулгайлсныхаа дараа скүүтерээр зугтсан хэрэг гарсан юм. Албан ёсны мөрдөн шалгах ажиллагааны дүнд музейн аюулгүй байдлыг хангах тоног төхөөрөмж дутагдалтай байгааг тогтоосон бөгөөд байгууламжийн аюулгүй байдлын талаар анхааруулга өгчээ.

Үйлдвэрчний эвлэлүүдийн зүгээс нэвтрэх хураамжийг нэмэгдүүлэх шийдвэрийг шүүмжилж, үүнийг “ялгаварлан гадуурхалт” гэж үзэх болно хэмээн анхааруулжээ.,

Эх сурвалж: AFP