БНХАУ-ын Төрийн Зөвлөлийн хэвлэлийн албанаас пүрэв гарагт зэвсэглэлд тавих хяналтын тухай Цагаан номыг танилцуулсан нь сүүлийн 20 жилийн хугацаанд гаргасан ийм төрлийн анхны баримт бичиг байлаа.
БНХАУ-ын Гадаад харилцааны яамны албан ёсны төлөөлөгч Лин Зян хэвлэлийн хурлын үеэр хэлэхдээ “манай улс өмнө нь зэвсэглэлийн хяналтын тухай Цагаан номыг 1995 ба 2005 онуудад гаргаж байсан” хэмээн дурдав.
Энэ онд дэлхийн II дайны ялалтын 80 жилийн ой, НҮБ байгуулагдсаны 80 жилийн ой тохиож буй түүхэн мөчид зэвсэглэлд хяналт тавих, зэвсэг хураах ба зэвсэглэлийг үл дэлгэрүүлэх тухай Цагаан номыг шинээр хэвлэн гаргаж байгаа нь онцгой ач холбогдолтой гэдгийг тэрбээр онцлон тэмдэглэлээ.
Бүс нутгуудад зэвсэгт мөргөлдөөн, тогтворгүй байдлын голомтууд дэгдсээр байна. Зэвсэглэлээр хөөцөлдөх явдал эрчээ авсаар байна. Энх тайван эсвэл дайн, яриа хэлэлцээ эсвэл сөргөлдөөн гэсэн сонголтын өмнө хүн төрөлхтөн дахин иржээ гэдгийг Хятадын дипломатч тэмдэглэн хэлэв.
Энэхүү баримт бичигт, сүүлийн 20 жилийн хугацаанд, ялангуяа ХКН-ын XVIII их хурлаас хойш БНХАУ-ын зүгээс зэвсэглэлийг хянах, зэвсэг хураах, зэвсэглэлийг үл дэлгэрүүлэх үйл явцад оруулсан бүтээлч хувь нэмэр, практик арга хэмжээ, үр дүнг тодорхой дурджээ.
Цагаан номыг шинээр гаргасан нь дэлхий дахины аюулгүй байдлын салбар дахь Санаачилга ба дэлхий дахины удирдлагын салбар дахь Санаачилгыг хэрэгжүүлэх талаар Хятад улс бодитой алхам хийж буйг илтгэн харуулж байна гэдгийг Лин Зян дурдлаа.
Эх сурвалж: Kazinform
