АНУ дахь Афганистаны иргэдийн цагаачлалын хүсэлтүүдийг боловсруулах бүх үйл явцыг шууд зогсоосон талаар АНУ-ын Иргэншил, цагаачлалын алба мэдэгджээ. Энэ шийдвэр нь Үндэсний гвардын хоёр цэргийг буудан шархдуулсан хэргийг мөрдөх шалгалтын хүрээнд аюулгүй байдлын болон нэвтрүүлэлтийн протоколыг эргэн хянах шаардлагатай болсонтой холбоотой гэж тайлбарлав. Хөндлөнгийн халдлагын сэжигтнээр нэрлэгдээд буй хорин есөн настай Рахманулла Лакамал нь 2021 оны есдүгээр сард АНУ-д ирсэн бөгөөд 2024 онд орогнол хүссэн хүсэлт нь энэ онд батлагдсан байна.

Тэрбээр АНУ цэргийнхэнтэй хамтран ажилласан афган иргэдийг нүүлгэн шилжүүлэх зорилготой “Operation Allies Welcome” хөтөлбөрийн хүрээнд орж ирсэн гэж албаны эх сурвалцуудад дурджээ. Халдлага Вашингтон хотын төвд, Фаррагут Сквер метроны орчимд 17-р болон I гудамжны уулзварт болсон бөгөөд өндөр харагдахуйц эргүүлд гарч байсан хоёр цэргийг гэнэт дайрч буудсан гэж мөрдөх албаныхан мэдээлсэн байна. Ойролцоо байсан бусад гвардынхан шуурхай ажиллаж, сэжигтнийг баривчилтал хяналтандаа авчээ.

АНУ-ын Ерөнхийлөгч Доналд Трамп уг халдлагыг террорын шинжтэй үйлдэл хэмээн тодорхойлж, Афганистанаас АНУ-д нэвтэрсэн бүх хүмүүсийг дахин нягтлах шаардлагатай гэдгийг мэдэгдэв. Мөн АНУ-ын дотоодын гэмт хэрэг “хяналтаас гарсан” хэмээн тодорхойлж, улс даяар мянга мянган Үндэсний гвардын албан хаагчдыг томилон ажиллуулсан нь хэд хэдэн хотод хууль эрх зүйн маргаан дагуулсаар байна.

Афганистаны иргэдийн нэвтрэлтийг хязгаарлах бодлого үүнээс өмнө ч хэрэгжиж байсан. Энэ оны эхээр АНУ Афганистан болон өөр арван нэгэн орны иргэдэд хориг тавьсан бол Зэвсэгт хүчинтэй хамтран ажиллаж, эрсдэлтэй болсон хүмүүсийн хувьд тусгай визийн ангилалд үл хамаарах зохицуулалт хэвээр үлдсэн байв. АНУ 2021 онд Афганистанаас цэргээ гаргасны дараа олон мянган афган иргэн тусгай хамгааллын хөтөлбөрийн дагуу АНУ-д нэвтэрсэн ч Трампын захиргаа энэ хамгаалалтыг цуцалж, түр орогнол олгох хөтөлбөрүүдийг зогсоосон билээ.

Эх сурвалж: BBC / CNN / Xinhua