АНУ-ын Жоржиа мужид Дональд Трампын 2020 оны сонгуулийн үр дүнг өөрчлөхийг оролдсон гэх хэргийг бүхэлд нь хаах шийдвэр гарлаа. Ингэснээр Трампт холбогдуулан яригдаж байсан дөрвөн эрүүгийн хэргүүдийн сүүлчийнх нь албан ёсоор дуусгавар болж байна. Уг шийдвэрийг шүүгч Скотт МакАфи гаргасан бөгөөд мөрдөн шалгалтыг хариуцаж авсан Питер Скандалакис хэргийг хэрэгсэхгүй болгох хүсэлт гаргасны дараа ийм төлөв гарчээ.

Саналаа тайлбарлахдаа Скандалакис энэхүү шийдвэр нь улс төрийн зорилготой бус, харин хууль зүйн үндэслэлд тулгуурласан хэмээн мэдэгдсэн. Тэрбээр өмнө нь Ардчилсан болон Бүгд найрамдах намаас нэр дэвшиж байсан байдал болон одоо нам харьяалалгүй байгууллагыг удирдаж буйгаа дурдан, шүүхийн шударга байдлыг хангах үүднээс хэргийг хаасан гэв.

Жоржиа муж 2020 оны сонгуулийн гол тулаан болсон мужуудын нэг бөгөөд тус мужид таван сая орчим санал өгөгдөхөд Жо Байден арван хоёр мянга орчим саналын зөрүүтэй ялж байсан. Гэсэн ч Трамп болон түүний холбоотнууд уг үр дүнг хүлээн зөвшөөрөхөөс татгалзаж, сонгуулийн дараах маргаан Жоржиа мужийг улс төрийн ширүүн тэмцлийн голомт болгосон юм. Трамп Жоржиа мужийн Төрийн нарийн бичгийн дарга Брэд Раффенспергертэй утсаар ярьсан бичлэг ил болсон нь улс төрийн маргааныг улам даамжруулсан. Тэр яриандаа өөрт хэрэгтэй саналын тоог “олохыг” шаардсан нь өргөн дуулиан тарьсан билээ.

Анхны хэргийг хэмжээнд нь хүргэж байсан Фани Уиллис нэр бүхий тусгай прокурортой хувийн харилцаатай байсан нь ашиг сонирхлын зөрчил үүсгэж магадгүй гэж үзэн шүүхээр хөндлөнгөөс оролцуулагдаж, 2024 онд хэргийг хэрэгсэхгүй болгох шийдвэрүүд гарсаар байв. Уиллисийг огцруулсны дараа Скандалакис хэргийг үргэлжлүүлэх эсэх асуудлыг авч, эцэст нь нэн их цаг, санхүү шаардсан энэ томоохон хэргийг үргэлжлүүлэх боломжгүй гэж дүгнэжээ.

Хэргийг хэрэгсэхгүй болгосноор зөвхөн Трамп бус хамт яллагдаж байсан бүх хүмүүст мөн адил үйлчлэхээр болов. Үүнд Руди Жулиани, Марк Медоус зэрэг Трампын ойрын хүрээний улстөрчид багтаж байна. Урьд нь дөрвөн яллагдагч буруугаа хүлээн, торгууль болон нийгмийн ажил хийх шийтгэл авч байсан ч одоо үлдсэн бүх хэрэг цуцлагдаж байгаа юм.

Энэхүү хэрэг нь Трампын хувьд хамгийн аюултай байж болохоор нэг тохиолдол гэж хуульчид үзэж байсан. Учир нь мужийн түвшний ял шийтгэлд Ерөнхийлөгчийн өршөөл үйлчлэхгүй учраас энэ процесс Трампын ирээдүйн улс төрийн амьдралд том эрсдэл дагуулж буйд тооцогдож байв. Шүүхийн шийдвэр гарснаар түүний өмнө тулгараад байсан эрүүгийн хариуцлагууд үндсэндээ дуусгавар болж, зөвхөн иргэний маргаанууд (жишээлбэл E. Jean Carroll-ийн шүүхийн шийдвэр гэх мэт) хэвээр үлдэж байна.

Хууль зүйч Антони Майкл Крейс уг хэргийг хаана гэж урьдчилан таамаглаж байсан ч Скандалакисын тайлбар нь Трамп болон холбоотнуудад нэлээд “эргэлзээгүй эрх олгосон” байгаад гайхаж буйгаа хэлэв. Тэрбээр ийм өргөн хүрээний процессийг үргэлжлүүлэхэд шаардагдах нөөц боломж Скандалакисын байгууллагад байхгүй нь тодорхой байсан гэдгийг онцлон дурдсан.

Ингэснээр Жоржиа мужийн 2020 оны сонгуулийн хэрэг улс төр, хууль зүйн маргаан дагуулсан олон жилийн үргэлжилсэн процессыг эцэслэн хааж, Трампын сүүлчийн эрүүгийн хэрэг төгсгөл боллоо.

Эх сурвалж: BBC.