Баруун Африкийн Гвиней-Бисау улсад улс төрийн хурц маргаан бүтэн хэмжээний цэргийн эргэлтэд хүрлээ. Цэргийнхэн төрийн мэдлийн TGB телевизийн фэйсбүүк хуудсаар мэдэгдэл гарган Ерөнхийлөгч Умару Сисоку Эмбалог засгийн эрхээс огцруулсан бөгөөд улсын бүх төрийн байгууллагыг хааж, далай, агаар, газрын хилийг түр хугацаагаар хаасан гэв. Энэхүү ажиллагааг улсын тогтвортой байдлыг хамгаалах зайлшгүй арга хэмжээ хэмээн тодорхойлжээ.

Цэргийн удирдлагын мэдээлснээр сүүлийн саруудад улс төрийн зөрчил хурцдаж, сонгуулийн дүнг өөрчлөх, эмх замбараагүй байдал өдөөх төлөвлөгөө илэрсэн тул ийнхүү хүч хэрэглэхээс өөр гарц үлдээгүй байна. Уг төлөвлөгөөнд зарим улстөрч болон мансууруулах бодисын наймаанд холбогддог бүлэглэл оролцсон гэж тэд онцлов. Нийслэл Бисау хотын ерөнхийлөгчийн ордон болон Сонгуулийн төв хорооны байрны орчимд буун дуу сонсогдож, эмх замбараагүй байдал үүссэн тухай гэрчүүд мэдээлжээ.

Jeune Afrique сэтгүүлийн мэдээлснээр Ерөнхийлөгч Эмбало өөрөө, мөн Дотоод хэргийн сайд, Зэвсэгт хүчний жанжин штабын дарга нарын хамт ерөнхийлөгчийн ордонд саатуулагдсан байна. Улс төрийн хурц нөхцөл байдал нь ардчиллын суурь тогтолцоо хэврэг Гвиней-Бисау улсад эрсдэл дагуулсан дүр зургаар үргэлжилж байна.

Тус улс дэлхийн хамгийн ядуу орны тоонд ордог бөгөөд энэ сарын хорин гуравнд ерөнхийлөгчийн болон парламентын сонгууль болсон ч нэр дэвшигчид санал тооллогын дүн эцэслэн гараагүй байхад өөрсдийгөө ялсан хэмээн зарлаж зөрчил үүсгэсэн. Сонгуулийн үр дүнг хорин долоонд зарлахаар байсан хэдий ч улс төрийн тогтворгүй байдал хурцадсан юм.

Умару Сисоку Эмбало 2020 оноос тус улсыг удирдаж байсан генерал бөгөөд түүний бүрэн эрхийн хугацаа хэдийн дууссан ч тухайн онд парламентыг тараасан нь эсэргүүцлийг улам нэмэгдүүлсэн. Түүнийг сөрөг хүчнийг шахан хавчих, хэвлэлийн эрх чөлөөнд халдах, хүний эрхийн зөрчил гаргах үйлдлээр шүүмжилдэг байв. Мөн гол сөрөг хүчний намыг сонгуульд оролцуулаагүй нь улс төрийн нөхцөл байдлыг улам хурцатгаж, бие даагч Диашийг дэмжих шалтгаан болсон байна.

Эх сурвалж: DW