Жил бүр уламжлал болон зохиогддог “Болор цом” яруу найргийн наадам энэ жил шинэ эздээ угтан авч, шилдэг шүлэгчээр Монголын Үндэсний олон нийтийн радиогийн редактор, Монголын Зохиолчдын эвлэлийн шагналт яруу найрагч, сэтгүүлч Нямжаргалын Минжинсайхан тодорлоо. Наадмын тайзнаа эгшиглэсэн түүний “Үг” хэмээх бүтээл уран сэтгэмж, хэл найруулгын онцгой чанараараа үнэлэгдэн тэргүүн байрт шалгарсан нь олон нийт, уран бүтээлчдийн талархлыг хүлээгээд байна.
Шүлэгт үгийн мөн чанар, хүний оршихуйн утга учир, хайр, тэсвэр, эх орон, эх дэлхийн уялдаа зэрэг сэдвийг уянгын гүн мэдрэмжээр холбон өгүүлсэн нь сонсогч, уншигчдад уран зохиолын үнэ цэнийг дахин сануулсан юм. Поэтик дүрслэл, гүнзгий бэлгэдэл, хүний дотоод ертөнцийн аяллыг илэрхийлсэн энэ бүтээл нь тус наадмын энэ жилийн онцлох өнгө төрх болж чаджээ.
Доор “Болор цом”-ын эзний “Үг” шүлгийг бүрэн эхээр нь хүргэж байна.
Үг
(Н.Минжинсайхан)
Хамаг хайрыг би үгнээс авч
Хамаг хайраа би үгэнд юүлсэн
Үг миний үндэс хөрс
Үг миний өвөг дээдэс
Үггүйгээр би өнөөдрийг барж чадахгүй
Үггүйгээр би өчигдөрт харьж чадахгүй
Үггүйгээр би үнэн аж төрж, амьсгалж чадахгүй
Үггүйгээр би өргөн олон, өрөөл бусдыг ч хайрлаж чадахгүй
Үг миний мөргөлийн сүм
Үг миний өргөлийн сум
Үг миний өстөн дайсан, бас хань нөхөр
Үг миний өрөвч зан, бас тэсвэр тэвчээр
Дардам мөртөө замаа олоогүй үгэнд
Зам болж
Далавчтай мөртөө тэнгэрээ олоогүй үгэнд
Тэнгэр болж явдаг би
Үгэн дотор далавч байдгийг харж
Үг шувуу шиг нисэж дүүлдэгийг ч үзэв би
Үгэн дотор өвс ногоо хөтлөлцөн ургаж
Үг үгийнхээ салхинд гандаж хагдардагийг ч танив би
Үг миний энхрий үрс
Үг миний эх нутаг
Үг миний эх орон
Үг миний эх дэлхий билээ.
Чулуу шиг үгэнд ус хадгалж
Нэлийсэн их далайг хурааж үзсэн би
Чулуу шиг үгнээс ус мөрнийг суллаж
Цэлийсэн тэнгэрийг амрааж ч явсан би
Уул шиг үгэнд тал сөхөрдөгийг харж
Ухаант өвгөдийнхөө үг сургаалыг дагасан би
Ус мөрөн шиг үгнээс амьтан хүн ундаалахыг үзэж
Улс гэртээ эзэн суухыг ч таньсан би
Үг миний өдөр хоног
Үг миний чөдөр аргамж
Үг миний мөр зам
Үг миний мөрөөдөл хүсэл
Үг төрж, үг өсдөг хорвоод
Үг өвдөж, үг эдгэдэг орчлонд
Үг уйлж, үг дуулдагийг таньснаас
Үг өтөлж, үг үхдэгийг харсангүй би!
Үг миний туургат - гэр орон
Үг миний тусгаар тогтнол - эрх чөлөө!
