Малайзын Засгийн газар 2026 оноос эхлэн 16-гаас доош насны хүүхдүүдийг нийгмийн сүлжээ ашиглахыг хориглох бодлого барьж буйгаа мэдэгдлээ. Энэ алхам нь Австрали зэрэг цахим хэрэглээний насыг чангатгаж буй орнуудын жишигийг дагаж гарч байгаа бөгөөд зорилго нь хүүхдүүдийг цахим дээрэлхэл, онлайн луйвар, бэлгийн мөлжлөг зэрэг өндөр эрсдэлтэй аюулаас хамгаалах явдал юм.

Харилцаа холбооны сайд Фахми Фадзилын хэлснээр, Засгийн газар гадаад орнуудын арга барилыг судалж, хэрэглэгчийн насыг үнэмлэх, паспорт ашиглан баталгаажуулах шийдлийг нэвтрүүлэх боломжийг ярилцаж байна. Тэрбээр хоригийг хэрэгжүүлэх нарийн хугацааг нэрлээгүй ч бүх тал үүргээ биелүүлж чадвал Малайз дахь цахим орчин хурдтай, боломжтой байхаас гадна хүүхэд, гэр бүлд хамгийн аюулгүй орон зай байх ёстой гэдгийг онцоллоо.

Малайзын дижитал аюулгүй байдлыг сайжруулах ажлын хүрээнд нэгдүгээр сараас эхлэн найман саяас дээш хэрэглэгчтэй нийгмийн сүлжээ болон мессежийн платформууд заавал лиценз авах шаардлагатай болсон. Лицензтэй платформууд нь хэрэглэгчдийн насыг баталгаажуулах, контентын аюулгүй байдлыг хангах, ил тод байдлын дүрэм мөрдөх үүрэгтэй болсон нь Засгийн газрын хяналт, зохицуулалтыг эрс чангатгаж байгааг харуулж байна.

Хүүхдүүдийн цахим хэрэглээг хязгаарлах дэлхийн анхны хуулийг Австрали батлаад хэдхэн хоногийн дараа хэрэгжүүлэх гэж байна. Арван хоёрдугаар сарын аравнаас эхлэн хэрэгжих уг хууль нь Facebook, Instagram, TikTok, X, YouTube зэрэг томоохон платформууд 16-гаас доош насныхны данс нээх боломжийг хаах үүрэгтэй. Хэрэв үүргээ биелүүлээгүй тохиолдолд платформ тус бүрд 50 сая австрали доллар хүртэл торгууль ногдуулах зохицуулалттай.

Эх сурвалж: AP