Пакистаны арми Афганистаны зүүн нутгийн Хост болон бусад бүсэд өчигдөр орой агаарын цохилт өгсний улмаас нийт арван энгийн иргэн, тэдний дотор есөн хүүхэд амиа алдсан талаар “Талибан”-ы засгийн газрын төлөөлөгч Забихулла Мужахид өнөөдөр мэдээллээ. Түүний хэлснээр Пакистаны хүчин нутгийн нэг гэрийг онилон бөмбөгдөж, эмэгтэй нэг хүн болон хүүхдүүд амиа алдсан байна. Мөн Кунар, Пактика мужуудад өгсөн цохилтын улмаас дөрвөн хүн шархадсан гэж нэмжээ. Талибууд уг үйлдлийг эрс буруушаан “зөв цагтаа хариу арга хэмжээ авна” гэж мэдэгдэв.

Пакистаны тагнуулын эх сурвалжууд dpa агентлагт мэдээлэхдээ, агаарын довтолгооны гол бай нь хилийн орчим нуугдаж буй Пакистаны талибууд байсан бөгөөд олон босогчийг устгасан хэмээн мэдэгджээ. Цэргийнхэн энэ ажиллагааг цаашид үргэлжлүүлэх боломжтой гэдгийг ч дурдсан байна.

Эдгээр цохилт нь өнгөрсөн сард хоёр улс гал зогсоох тохиролцоонд хүрсэн ч сүүлийн арван жилүүдэд тохиогоогүй хурц мөргөлдөөний дараах эмзэг байдлыг дахин дордуулж буйг тэмдэглэжээ. Хоёр улсын харилцаа 2021 онд талибууд Афганистанд эрх мэдэлд гарснаас хойш огцом муудсан бөгөөд хилийн бүсэд зэвсэгт мөргөлдөөнүүд тасралтгүй гарах болсон юм.

Агаарын цохилтын өмнөх өдөр Пакистаны Пешавар хотын аюулгүй байдлын цогцолбор руу амиа золиослогчид халдлага үйлдэж, гурван алба хаагч амиа алдан, арван нэгэн хүн шархадсан тухай цагдаагийн байгууллага мэдээлсэн. Халдлагын хариуцлагыг одоогоор аль ч бүлэглэл хүлээгүй ч төрийн мэдлийн PTV телевизийн мэдээлснээр халдлага үйлдсэн этгээдүүд Афганистаны иргэд байсан гэжээ.

Пакистаны Ерөнхийлөгч Асиф Зардари уг халдлагад Пакистаны “Талибан” бүлэглэлийг буруутгасан бөгөөд тус бүлэглэл энэ сарын эхээр Исламабад хотноо арван хоёр хүний амийг авсан амиа золиослогчийн халдлагын хариуцлагыг өөрсдөө хүлээсэн байдаг. Пакистаны талын мэдээлснээр уг бүлэглэлийн удирдлага Афганистанд төвлөрсөн хэвээр байгаа нь хоёр улсын дунд хурцадмал байдлыг улам нэмэгдүүлж байна.

Афганистан, Пакистаны энхийн хэлэлцээ мухардмалд орж, талибуудын засгийн газар үүнийг Пакистан хамтран ажиллах сонирхолгүй, хариуцлагагүй хандлагын үр дүн гэж тайлбарлажээ. Пакистан улс Афганистанд байрлаж буй Пакистаны талибуудын бүлэглэлд хатуу арга хэмжээ авахыг Кабулаас удаа дараа шаардаж ирсэн ч бодит ахиц гараагүй хэвээр байна.

Эх сурвалж: DW, dpa