Тайваньд үүсэж болзошгүй нөхцөл байдлын талаар хэлсэн үгээ буцаахыг Японы Ерөнхий сайд Такаичи Санаэгээс хүссэн Хятадын хүсэлтийг няцаах асуудлаар Япон Улсаас НҮБ-ын дэргэд суугаа Байнгын төлөөлөгч Ямазаки Казүюки даваа гарагт НҮБ-ын Ерөнхий нарийн бичгийн дарга Антонио Гутерришт захидал илгээжээ.

Я.Казүюки захидалдаа Японы үндсэн бодлого нь зөвхөн батлан​​​​ хамгаалах чиглэлтэй стратеги гэдгийг онцолсон байна. Улмаар тэрбээр зэвсэгт мөргөлдөөн гараагүй ч гэсэн Япон өөрийгөө хамгаалах эрхээ эдэлнэ гэх санааг илэрхийлсэн Хятадын мэдэгдлийг буруу хэмээн үзжээ.

Я.Казүюки мөн Тайванийн талаарх улс орных нь байр суурь 1972 онд хоёр улс дипломат харилцаагаа хэвийн болгосон Япон-Хятадын хамтарсан мэдэгдлийг гаргаснаас хойш өөрчлөгдөөгүй гэдгийг хэлээд, Тайванийн асуудлыг яриа хэлэлцээний замаар энх тайвнаар шийдвэрлэнэ гэж Токио найдаж байгааг нэмж хэлсэн байна.

Хятадын тал далайн гаралтай бүтээгдэхүүний худалдаа зэргээр Японтой харилцах ард түмэн болон эдийн засгийн харилцаагаа царцааж байгааг тэрбээр дурдаад, Япон улс энэ асуудлыг яриа хэлэлцээний замаар тайван байдлаар шийдвэрлэх болно гэж мэдэгджээ.

Өнгөрсөн долоо хоногт НҮБ-д суугаа Хятадын Байнгын төлөөлөгч Фу Конг А.Гутерришт илгээсэн захидалдаа Т.Санаэгийн хэлсэн үг нь “Тайванийн асуудалд цэргийн хүчээр оролцох хүсэл эрмэлзлээ Япон улс анх удаа илэрхийлсэн тохиолдол болсон” гэж мэдэгдсэнийг төрийн мэдлийн “Xinhua” агентлаг уламжилсан байна.

Энэ сарын 7-нд парламентын хуралдааны үеэр Т.Санаэгийн хэлсэн үгийг Бээжин хатуу шүүмжилснээс хойш Япон, Хятад улсуудын хооронд дипломат маргаан үүсээд байгаа юм. Т.Санаэ Тайвань руу цэргийн хүчээр дайрвал Японы хувьд “үндэсний аюулгүй байдалд заналхийлсэн нөхцөл байдал үүсэж болзошгүй” гэж хэлжээ.

Эх сурвалж: Kyodo