Австрийн дүрслэх урлагийн мастер Густав Климтын бүтээл болох Элизабет Ледерерын хөрөг дуудлага худалдаагаар 236.4 сая ам.доллар хүрч, орчин үеийн урлагийн түүхэнд хэзээ ч арилжаалагдаж байгаагүй хамгийн өндөр үнэтэй зураг боллоо гэж The New York Times мэдээлэв.

Энэ бүтээл нь өнгөрсөн зургадугаар сард 92 насандаа таалал төгссөн, Estée Lauder-ын өв залгамжлагч тэрбумтан Леонард Лаудерын цуглуулгын нэг хэсэг байсан бөгөөд Sotheby's ордонд болсон дуудлага худалдаа эхлээд 150 сая долларын үнэлгээтэй эхэлжээ. Ердөө хорин минутын дотор зургаан худалдан авагч өрсөлдсөний эцэст үнэ нь комиссын зардалтайгаа хамт 236.4 сая долларт хүрсэн байна. Худалдан авагчийн нэрийг Sotheby’s нууцалсан ч үнэ 200 саяд хүрэх мөчид ордны эзэн Патрик Драи болон ерөнхий захирал гар барин баярласнаар дуудлагын танхимд ховорхон догдлол төрүүлжээ.

Уг орой Лаудерын урлагийн цуглуулга нийт 527.5 сая ам.долларын борлуулалт хийсэн нь Sotheby’s-ийн хувьд онцгой амжилт байв.

Өмнөх дээд амжилтыг 2020 онд Энди Уорхолын Shot Sage Blue Marilyn бүтээл тогтоож, 195 сая ам.доллараар зарагдаж байсан. Харин бүх цаг үеийн дуудлага худалдаагаар хамгийн үнэтэйд тооцогдох зураг нь Леонардо да Винчигийн Ертөнцийг аврагч бөгөөд 2017 онд Christie’s ордонд 450.3 сая ам.доллараар зарагдсан байдаг.

Орчин үеийн урлагийн хувийн арилжаанд илүү өндөр үнээр үнэлэгдсэн хоёр зураг бий: Виллем де Кунингийн Солилцоо (300 сая ам.доллар, 2015 он) болон Поль Сезанны Хөзөр тоглогчид (250 сая ам.доллар, 2012 он). Гэвч эдгээр нь дуудлага худалдаагаар зарагдаагүй тул албан ёсны дээд амжилтын жагсаалтад ордоггүй.

Эх сурвалж: Officelife.media