Их Британийн дуудлага худалдаанд “111” гэсэн тоотой автомашины улсын дугаар анхны үнийн саналтайгаа харьцуулахад 4.5 дахин өндөр үнээр зарагдаж, өмнөх дээд амжилтыг эвдлээ.

Анх £55–60 мянгаар үнэлэгдсэн тус лот хоёр худалдан авагчийн өрсөлдөөн нэмэгдэхийн зэрэгцээ үнэ нь огцом өссөөр £270 мянган фунт стерлингт (ойролцоогоор 353 мянган ам.доллар) хүрч худалдаалагдсан талаар BBC мэдээлэв.

Энэхүү үнэ нь Британийн дуудлага худалдааны түүхэнд автомашины улсын дугаарт өгсөн хамгийн өндөр үнэ болж буй бөгөөд өмнөх рекорд болох “007” дугаарын £240 мянгын амжилтыг давсан байна.

Гурван “1” тоотой энэ дугаарыг худалдан авсан хүний нэр нууцлаг хэвээр байгаа ч тэрээр Гэрнси арлын (St Peter Port) оршин суугч гэдгийг дуудлага худалдааны төлөөлөгч мэдэгджээ. “Тун удахгүй арлаар ийм дугаартай машин явж байхыг хүмүүс харах биз ээ” хэмээн тэд хэлсэн байна.

Эх сурвалж: Officelife.media