АНУ-ын дэд ерөнхийлөгч Жей Ди Вэнс Украины мөргөлдөөнийг зогсоох ямар ч энхийн төлөвлөгөөнд заавал багтах ёстой гурван зарчмыг нэрлэв. Түүний хэлснээр иргэдийн эсрэг дайралтыг нэн тэргүүнд зогсоохын зэрэгцээ Украины тусгаар тогтнолыг хадгалах, мөн төлөвлөгөө нь Орос, Украин хоёр талд аль алинд нь хүлээн зөвшөөрөгдөх шаардлагатай. Үүнээс гадна дахин байлдааны ажиллагаа эхлэхгүй байх нөхцөлийг бүрдүүлэх нь энхийн шийдлийн зайлшгүй хэсэг гэж тэр онцолжээ. “Зөвхөн зэвсэг мөнгө нэмж, хориг чангаруулах нь ялалтыг ойртуулахгүй. Энх тайвныг бодит ертөнцөд амьдардаг ухаалаг хүмүүс тогтоодог” гэж Вэнс Х сүлжээндээ бичсэн байна.

Axios порталыг ишлэн мэдээлснээр Москва, Вашингтон хоёр Украины асуудлаарх 28 заалт бүхий шинэ төлөвлөгөө хэлэлцэж байгаа бөгөөд үүнд Крым болон Оросын хяналтад орсон бусад нутаг дэвсгэрийг Москвагийн мэдлийнх гэж хүлээн зөвшөөрөх, Украины зэвсэгт хүчнийг 400 мянган хүн хүртэл бууруулах, Киев алсын тусгалын зэвсгээс татгалзах, НАТО-д элсэх хугацаагаа хэдэн жилээр хойшлуулах зэрэг нөхцөл багтсан байна. АНУ-ын Талархлын өдрийг буюу ирэх арваннэгдүгээр сарын 27-ныг Киев Вашингтоны саналыг хүлээн авах тохиромжтой өдөр хэмээн Дональд Трамп мэдэгджээ.

Украины асуудлаарх АНУ, Европын Холбооны төлөөлөгчдийн уулзалт таагүй уур амьсгалтай болсон талаар Financial Times мэдээлэв. Сонины эх сурвалжийн мэдээлснээр нэгэн өндөр албан тушаалтан уг уулзалтыг “бөөлжис цутгам” өнгө аяс давамгайлсан хэмээн тодорхойлжээ. АНУ-ын явган цэргийн армийн сайд Дэниел Дрисколл уулзалтад оролцогчдод Вашингтоны санал болгож буй төлөвлөгөөнд эргэлзэх зүйлгүй, одоохондоо хэлэлцээр хийх боломж байхгүй хэмээн мэдэгдсэн нь хэлэлцээг хурдан таагүй болгосон гэж зарим эх сурвалж хэлсэн байна. Түүнчлэн Украиныг дэмжихэд тодорхой хязгаар тогтоох ёстой гэсэн байр суурь илэрхийлсэн нь маргаан дагуулжээ.

Өмнө нь Оросын Ерөнхийлөгчийн хэвлэлийн төлөөлөгч Дмитрий Песков Украины талд шийдвэр гаргах хугацаа багасаж буйг сануулаад, энхийн хэлэлцээг үгүйсгэн дайн үргэлжлүүлэх нь “Украинд утгагүй бөгөөд аюултай сонголт” болохыг анхааруулсан байна.

Эх сурвалж: Financical times