Хятад улс 2025 онд гурав дахь жилдээ дараалан дэлхийн хамгийн том автомашин экспортлогч орны байр сууриа хадгалж байна гэж Yicai мэдээллээ.

1980 оноос хойш автомашины хамгийн том экспортлогч нь Япон байсан ч Хятад 2023 онд энэхүү үзүүлэлтээр анх удаа Японыг давсан билээ. Харин энэ жилийн эхний гурван улирлын байдлаар Хятад 4.95 сая автомашин экспортод гаргасан бол Япон 3.06 саяыг гадаадад нийлүүлжээ.

Экспортын өсөлтөд цахилгаан автомашины борлуулалт голлон нөлөөлсөн бөгөөд Хятад улс өнгөрсөн жил сард 100 мянга орчим цахилгаан автомашин экспортолж байсан бол 2025 онд энэ тоо 200 мянгад хүрсэн байна.

Европын зах зээлд Хятадын автомашин үйлдвэрлэгчид улам нөлөөтэй болж буйг статистик харуулж байна. Тухайлбал, BYD брэндийн автомашины борлуулалт Suzuki-г давсан бол Chery концерн Европт Mitsubishi-гийн үзүүлэлтийг давжээ.

Ийнхүү Хятадын авто үйлдвэрлэл, ялангуяа цахилгаан автомашины салбар дэлхийн авто зах зээлд давамгай байр сууриа үргэлжлүүлэн бататгаж байна. 

Эх сурвалж: Известия