Казакстан улсын Астана хотод анх удаа зохион байгуулагдсан "Silk Way Star" Азийн олон улсын дууны уралдааны Гран при шагналыг  Монголын дуучин Ч.Мишээл /Michel Joseph/ хүртлээ.

Финалын шатанд дуучин Мишээл нийт 12 шүүгчээс хамгийн өндөр буюу 12 оноог авсан бөгөөд ялагчийг тодруулахад үзэгчдийн өгсөн санал шийдвэрлэх үүрэгтэй байлаа.  Шүүгчдийн өгсөн оноог 50%, онлайнаар оролцсон үзэгчдийн саналыг 50% хувийн үнэлгээгээр тооцжээ.

Шүүгчид болон үзэгчдийн өгсөн саналыг нэгтгэн ялагчийг тодруулахад Ч.Мишээл 85 оноогоор тэргүүлж, ялагчийн шагналыг авсан бол Казахстан улсын оролцогч 80 оноо, Узбекстан улсын оролцогч 76 оноогоор хоёр, гуравдугаар байрт шалгарлаа. 

Уралдааны дүрмийн дагуу оролцогч орны иргэд /монголчууд/ санал өгөх эрхгүй байсан тул гадаадад суугаа монголчууд оролцогчоо дэмжиж санал хураалтад оролцов. Мөн Казакстаны үзэгчид Монголын дуучин Ч.Мишээлийг тэмцээний туршид хамгийн ихээр дэмжжээ.

Финалын шатанд дуучин Ч.Мишээд өөрийн зохиосон "Монгол" дуугаар өрсөлдсөн бөгөөд уг дууны анхны сонсогч, үзэгч нь "Silk Way Star" шоуны үзэгчид болов. Дуучин мишээл энэ дууныхаа тухай "Монголын тал нутгийг мэдрүүлэхийг хүссэн" хэмээн ярилцлага өгсөн бөгөөд поп болон хип хоп стилийг хослуулж, уртын дууны шуранхайг дуулалтдаа ашигласнаараа онцлог байлаа. 

"Silk Way Star" Азийн олон улсын дууны уралдаанд Монгол, Азербайжан, Армени, Гүрж, Казахстан, Хятад, Киргиз, Малайз, Тажикистан, Туркменистан, Узбекистан, Өмнөд Солонгос зэрэг 12 орны шилдэг оролцогчид өрсөлдөж, гурван сар гаруйн хугацаанд үргэлжилсний эцэст ялагчийг тодрууллаа.