“Гурван сүүдрийн театр” нэртэй шинэхэн, өвөрмөц уран бүтээлийн төв албан ёсоор байгуулагдаж буйгаа зарлан, нээлтийн тоглолтдоо зохиолч Балжирын Сүнжидмаагийн “Хөх тойрог” хэмээх экзистенциалист драмын жүжгийг сонгон бүтээж байна.

Жүжгийн ерөнхий найруулагч Иваны Оюун-Эрдэнийн хэлснээр “Хөх тойрог” нь хүний оршихуйн утга учир, нийгмийн дунд өөрийгөө батлан харуулах гэсэн дотоод эрэл, түүнийг дагасан зөрчил тэмцлийг хамгийн нягт, хамгийн эмзэг хэлбэрээр илэрхийлдэг бүтээл аж. Тэрээр энэ жүжгийг “хүлээн зөвшөөрөгдөх гэсэн хүний дуугүй хашхираан, түүнийг нэвт огтолж буй дотоод тэмцэл” хэмээн тодорхойлжээ.

Жүжгийн төслийн санаачлагч нь МЗХ-ны дэд ерөнхийлөгч, Эмэгтэйчүүдийн зөвлөлийн тэргүүн Жамбалын Нямаа юм. Тэрбээр нийгэмд үл анзаарагдах хэрнээ хүндхэн дарамт үүсгэж буй гурван асуудал — гэр бүл төлөвлөлт, хүсээгүй жирэмслэлт, үр хөндөлтийн талаарх нээлттэй хэлэлцүүлгийг театрын урлагийн хэлээр хүргэх зорилготойгоор энэхүү бүтээлийг дэмжин ажиллаж буйгаа онцолжээ. Жүжгийн агуулга нь зөвхөн уран сайхны бүтээл төдий бус, мөн үзэгчдийн дунд ухамсарт хэлэлцүүлэг өрнүүлж, гарсан санал бодлыг бодлогын түвшинд тусган ажиллах үндэс болох зорилготой.

“Гурван сүүдрийн театр”-ыг үүсгэн байгуулагч нь МЗЭ-ийн шагналт зохиолч Ороолонгийн Элбэгтөгс юм. Тэрээр Соёлын яам, УДЭТ, МЗЭ-ээс 2025 онд зохион байгуулсан улсын уралдаанд “Хүүхэд залуучууд” болон “Түүхэн” номинацид давхар шагнал хүртсэн, уран бүтээлийн өвөрмөц ертөнц бүхий жүжгийн зохиолч билээ. Түүний байгуулсан энэ театр нь уламжлалт бүтээлүүдийг орчин цагийн сэтгэлгээтэй хослуулан шинэ тайзны хэллэгээр хүргэх, мөн мартагдсан зохиолуудыг дахин амилуулах, олон нийтэд хүрээгүй бүтээлүүдийг олонд түгээх өргөн зорилготойгоор ажиллаж эхэлснээ мэдэгджээ.

“Хөх тойрог” экзистенциалист драма — Нээлтийн үзвэр

Чөлөөт харилцааг бие биеэсээ нууцлалгүй, хэн хэн нь хүлээн зөвшөөрөн сонгосон залуу хос. Тэд сонголтоо тулгадаггүй, оролддоггүй, харилцаагаа эрх чөлөөтэй, хөнгөн мэт авч явсаар өнөөг хүрнэ. Гэвч бүсгүйн жирэмслэлт гэх ганцхан мэдээ тэдний амгалан мэт харагдах тойргийг нэг л өдөр огтолж орж ирнэ.

Бүсгүй үнэхээр бие давхар болсон уу? Эсвэл залуугийн хардлагаас үүдсэн төөрөгдөл үү? Энэ асуулт тэдний хооронд үл үзэгдэх зөрчил, болгоомжлол, айдсыг асааж, сонгосон чөлөөт харилцаа нь үнэндээ ямар эмзэг, ямар хэврэг оршихуй дээр тогтсоныг илчилж орхино.

Оршихуйгаа авч үлдэх хүч нь тэдэнд бий юу? Эсвэл өөрсдийн оршихуйн цөмийг үгүйсгэн эмзэг холбоогоо алдаж дуусах бол уу?

Энэ бол зөвхөн тэдний түүх бус, үзэгч бүрийн дотор нуугдсан асуултуудыг зөөлөн хөдөлгөх дотоод аялал юм. Жүжиг хаашаа эргэж төгсөхийг үзэгч таны эрэл, таны мэдрэмж шийднэ.

Уран бүтээлчид

• Төслийн санаачлагч: Жамбалын Нямаа

• Зохиолч: Б.Сүнжидмаа

• Продюсер: О.Элбэгтөгс

• Найруулагч: И.Оюун-Эрдэнэ

• Жүжигчид: Б.Чинбат, О.Хулан

• Тайзны зураач: Э.Амарсанаа

• Хөгжмийн зохиолч: Л.Энх-Амгалан (Нисванис Амгаа)

• Хөгжмийн найруулга: Э.Доржсүрэн

• Хугацаа: 80 минут

Тоглолтын хуваарь

• 2025.11.28 — 19:00

• 2025.11.29 — 13:00

• Хаана: Төмөр замын чуулга “Ган Зам” палас

• Тасалбар захиалга: ticket.mn/event/2801

Театрын зорилго

Зохиолч О.Элбэгтөгс театрынхаа зорилгын талаар:
“Манай театр орчин үеийн соёл, сэтгэлгээ, амьдралын хэв маягт нийцсэн шинэлэг бүтээлийг дэмжихийн зэрэгцээ Монголын театрын урлагийн түүхэн өвийг дахин амилуулж, мартагдсан зохиолуудыг тайзанд сэргээж тоглох, мөн шинэ зохиолчдыг нээн дэмжих, дэлхийд олонд түгээгүй өвөрмөц драмын бүтээлүүдийг орчуулан тайзанд хүргэх бодлого баримталж байна” хэмээн онцолжээ.

    Нээлтийн уран бүтээлээр Балжирын Сүнжидмаагийн зохиол "Хөх тойрог" жүжгийг сонгосон бөгөөд найруулагчаар нь И.Оюун-Эрдэнэ найруулагч ажилласан байна. Жүжгийн тасалбарыг энд-ээс аваарай.