АНУ-ын Ерөнхийлөгч асан Барак Обама “төрийн эргэлт хийхийг завдсан”, “улс төрийн зорилгоор тагнуулын байгууллагуудыг ашигласан” гэх ноцтой буруутгалтай нүүр тулгарч байна гэж АНУ-ын Үндэсний тагнуулын албаны дарга Тулси Габбард мэдэгджээ.
Тэрбээр Обамагийн Засаг захиргаа 2016 оны АНУ-ын Ерөнхийлөгчийн сонгуулийн үеэр ОХУ-ын оролцоотой холбоотой тагнуулын дүгнэлтүүдийг улс төрийн зорилгоор ашигласан, Дональд Трампын эрх мэдлийг хязгаарлах оролдлого хийсэн гэж мэдэгдсэн байна. Мөн 2016 оны арванхоёрдугаар сард тагнуулын шинэ илтгэлийг өмнөх үнэлгээнээс өөрчлөхийг тушаасан гэж тэрээр илчилжээ.
Тулси Габбардын мэдэгдэл АНУ-ын улс төрийн хүрээнд маргаан дэгдээгээд байгаа бөгөөд шинжээчид түүний гаргасан мэдээллийг баттай нотлогдоогүй, зарим нь “буруу тайлбарласан” гэж үзэж байна. Обамагийн талаас одоогоор албан ёсны тайлбар хийгдээгүй байна.
Хууль зүйн шинжээчдийн үзэж буйгаар Ерөнхийлөгч асан Обама улс төрийн буруутгалд өртсөн ч шүүхийн шатанд шийтгэл хүлээлгэх эсэх нь тодорхойгүй хэвээр байна. Ерөнхийлөгчийн алба хашиж байх хугацаанд гаргасан зарим үйлдэл нь албан үүргийн хүрээ гэж үзэгддэг тул хуулийн дархан эрх хамгаалалттай байх боломжтой гэж тэд дүгнэжээ.
Тулси Габбардын мэдэгдэлд дурдсан баримтуудын бодит байдал баталгаажаагүй байгаа бөгөөд АНУ-ын прокурорын байгууллага, холбооны мөрдөн шалгах агентлагуудын зүгээс Обамагийн эсрэг ямар нэгэн албан ёсны мөрдөн шалгалт эхлүүлсэн талаар мэдээлэл гараагүй байна.
АНУ-ын улс төрийн хүрээнд энэ асуудал цаашид хэрхэн өрнөх нь олон нийтийн анхаарлыг татаж байна.
Эх сурвалж: Новости Россий
