“Оюу толгой” компанийн санхүүжилтээр Сэлэнгэ аймгийн Алтанбулаг сумын Тужийн нарсны тусгай хамгаалалттай газарт Байгаль орчны гавьяат ажилтан Б.Эрдэнэчимэг захиралтай “Ой баясах” компани 150 га-д нарс, шинэс хосолсон ойжуулалтын ажлыг хийж гүйцэтгээд байна. 

Монгол Улсын Ерөнхийлөгчийн санаачлан хэрэгжүүлж байгаа “Тэрбум мод” үндэсний хөдөлгөөнд төр, хувийн хэвшлийн олон байгууллага нэгдэн идэвхтэй оролцож байна. Үүний нэг “Оюу толгой” компанийн зүгээс 100 сая мод тарих амлалт өгч, “100 сая мод өвлүүлэн үлдээе” хөтөлбөрийг хэрэгжүүлэн гүйцэтгэлээ бодитоор тарьж ургуулах буюу дүйцүүлэх гэсэн хоёр чиглэлээр хийж байгаа юм.

Алтанбулаг суманд шинэсэн ойн хэмжээ буурч байгаа учраас тус компани 30 га талбайд шинэсний тарьц тарьжээ. Хавар ойжуулалтаа эхлүүлж, намрын тооллогоо сая хийж дууссан байна. Тарьсан ойн ургалт 90 хувиас дээш байгаа гэв. Монгол орны ойн нөөцийг нэмэгдүүлэх, ойн салбарын тогтвортой хөгжлийг дэмжих, тус салбарт үйл ажиллагаа явуулж буй аж ахуйн нэгжүүдэд “Оюу толгой”-н санхүүжилт бодитой хөрөнгө оруулалт, дэмжлэг болж байгааг тус компанийнхан ярьж байв. 

Сэлэнгэ аймгийн тухайд байгалийн нөөцийн судалгаагаа гаргасан анхны аймаг гэдгээрээ онцлогтой. Сэлэнгэ аймгийн хэмжээнд хомсдол, доройтолд өртсөн 250 мянган га-д ойжуулалт хийх хэрэгцээ, шаардлага үүсээд байгаа юм. Үүнд Тужийн нарсны тодорхой хэсэг ч багтаж байгаа.

Сэлэнгэ аймаг “Тэрбум мод” үндэсний хөдөлгөөн эхэлснээс хойш 23.4 сая мод тарьж, ургуулж, амлалтаа давуулан биелүүлсэн анхны аймаг бөгөөд нэг үгээр хэлбэл бэлтгэл шатандаа амлалтаа биелүүлсэн юм.

Сэлэнгэ түмэн тужийн нарсыг нөхөн сэргээж, ойжуулсан арвин туршлага хуримтлуулсан, мөн мэргэшсэн хүний нөөцтэй, тарьц суулгац бэлтгэдэг, мод үржүүлгийн мэргэжлийн байгууллагуудтай зэрэг нь давуу тал болж байгааг аймгийн БОГ-ын Ойн албаны дарга Г.Цэнгэлзаяа онцоллоо.

 “Оюу толгой” компани Алтанбулаг суманд 2024 онд 400 га, 2025 онд 150 га гээд нийт 550 га талбайн ойжуулалтын ажилд хөрөнгө оруулалт хийжээ.

 Алтанбулаг сум нарсан ой давамгайлсан ойн сантай. Иймээс сүүлийн үед холимог ой бий болгох зорилгоор нарс, шинэсээр ойжуулж байгаа юм.