Саудын Арабын угсаа залгамжлагч хунтайжид зориулан АНУ-ын Ерөнхийлөгч Дональд Трампын Цагаан ордонд зохион байгуулсан тансаг оройн зоогт уригдсан зочдын дунд Португалын алдарт хөлбөмбөгчин Криштиану Роналду, тэрбумтан Илон Маск нар байлаа. 

Саудын Арабын “Аль-Наср” клубт тоглож буй К.Роналду их хэмжээний хөлс мөнгөөр хаант улсын төлөө тоглож буй олон хөлбөмбөгчний нэг юм. Энэ зун Саудын Арабын клубтэй байгуулсан гэрээгээ дахин сунгасан 40 настай тэрбээр АНУ-ын Ерөнхийлөгч, Саудын угсаа залгамжлагч хунтайж Мухаммед бин Салман нарыг орж ирэхээс хэдхэн секундийн өмнө Д.Трампын ширээний дээд хэсгийн ойролцоо суусан байна.

“Та мэдэх байх, миний хүү бол Роналдугийн шүтэн бишрэгч” гэж Д.Трамп оройн зоог барихын өмнө хэлсэн үгэндээ дурдаад, хөлбөмбөгийн хорхойтон 19 настай хүү Баррон нь домогт тоглогчтой уулзсан гэдгийг нэмж хэлжээ. “Тэр одоо аавыгаа арай илүү ихээр хүндэлдэг болсон гэж би бодож байна, чамтай танилцуулсан учраас” хэмээн тэрбээр хэллээ.

К.Роналду бол оройн зоогт байлцсан хөл бөмбөгтэй холбоотой цорын ганц зочин биш бөгөөд Олон улсын хөл бөмбөгийн холбооны /ФИФА/ тэргүүн Жанни Инфантино АНУ-ын хамтран зохион байгуулах 2026 оны дэлхийн аварга шалгаруулах тэмцээний /ДАШТ/ өмнө Цагаан ордонд дахин иржээ.

К.Роналду ирэх жилийн ДАШТ түүний хувьд эргэлзээгүй сүүлчийн тэмцээн байх болно хэмээн мэдэгдээд байгаа юм. Португалын шигшээ баг өнгөрсөн ням гарагт ДАШТ-д оролцох эрхээ авсан билээ.

Мөн оройн зоогт “Space X”, “Tesla”-гийн гүйцэтгэх захирал И.Маск оролцсон нь Ерөнхийлөгч болон дэлхийн хамгийн баян хүний ​​хооронд үүсээд байсан маргаан намжсаныг илтгэжээ. Өмнөд Африкт төрсөн И.Маск Засгийн газрын үйл ажиллагааны үр дүнг хянах яамыг таван сар удирдсан бөгөөд Д.Трампыг тавдугаар сард Саудын Арабад айлчлахад дагалдан явсан юм.

Гэвч И.Маск Д.Трампын том зардалтай төслийг шүүмжилж, дараа нь Ерөнхийлөгчийн нэр бэлгийн хүчирхийллийн гэмт хэрэгт үйлдэгч Жеффри Эпштейнтэй холбоотой мөрдөн байцаалтын хавтас хэрэгт байгаа гэж хэлсний дараа долоодугаар сард тэдний харилцаа мууджээ. Д.Трамп хариуд нь И.Маскийг албадан гаргана гэж сүрдүүлж байв. Харин мягмар гаргийн орой хар өнгийн хослол өмссөн И.Маск лаа асаасан ширээн дээр бусад зочидтой ярилцаж байгаа нь харагджээ. Гэхдээ энэ нь Д.Трампын сууж байснаас өөр ширээ байв. Оройн зоогийн үеэр Д.Трамп Саудын Арабын хунтайжийг “манлайлагч эр” хэмээн магтсан байна.

Эх сурвалж: AFP