Бангладешийн шүүхээс Ерөнхий сайд асан Шейх Хасинад хүмүүнлэг ёсны эсрэг гэмт хэрэг үйлдсэн хэргээр цаазаар авах ялыг даваа гарагт буюу өчигдөр эчнээгээр оноожээ. 
Оюутны бослогыг хүчээр дарах тушаал өгсөн эсэх асуудлаарх шүүх хуралд оролцохыг шаардсан шүүхийн тогтоолыг 78 настай Шейх Хасина үл ойшоосон байна. Энэхүү бослого нь түүнийг албан тушаалаасаа огцроход хүргэсэн юм.

Шүүхийн шийдвэрийг үндэсний телевизээр шууд дамжуулсан бөгөөд 2024 оны наймдугаар сард Хасинаг огцруулснаас хойш болох анхны сонгуулийн өмнө зарлаж байна. Сонгуулийг 2026 оны 2 дугаар сард хийхээр товложээ.

“Хүмүүнлэг ёсны эсрэг гэмт хэргийн бүрэлдэхүүний бүх шинжийг нотолсон” гэж шүүгч Гол Мортуз Мозумдер мэдэгдсэн бөгөөд Хасина өдөөн турхирсан, хүний аминд хүрэх тушаал өгсөн, томоохон гэмт хэргийг үйлдэх боломж олгосон гэсэн гурван зүйл ангиар гэм буруутай нь тогтоогдсон байна. “Бид түүнд зөвхөн цаазын ял оноохоор шийдвэрлэлээ” гэж Мозумдер онцолжээ. Бангладешт цаазаар авах ялыг дүүжлэх замаар гүйцэтгэдэг.

Одоогоор эрэн сурвалжлагдаж буй Дотоод хэргийн сайд асан Асадуззаман Хан Камал хүмүүнлэг ёсны эсрэг дөрвөн гэмт хэрэгт буруутай нь тогтоогдсоны дараа түүнд мөн цаазаар авах ял оноожээ. Шүүх хуралд оролцож, гэм буруугаа хүлээсэн цагдаагийн дарга асан Чоудхури Абдулла аль-Мамун таван жилийн хорих ял авсан байна.

Шүүх хуралд Хасинаг улсаас томилсон өмгөөлөгч төлөөлөн оролцжээ. Ерөнхий сайд асан шүүхийн шийдвэрийн талаар мэдэгдэхдээ "нэг талыг барьсан, улс төрийн сэдэлтэй" гэжээ. Орогнол олгосон Энэтхэгээс хийсэн мэдэгдэлдээ Хасина "яллах дүгнэлтийг урьдчилан төлөвлөсөн байсан" хэмээн онцолсон байна. Ройтерс агентлагийн мэдээлснээр, Бангладешийн эрх баригчид Хасина, Камал нарыг шилжүүлэн өгөхийг Энэтхэгээс шаарджээ.

НҮБ-ын мэдээлснээр, Бангладешт болсон олон нийтийн эсэргүүцлийн жагсаалыг дарах үеэр 1400 хүн амиа алджээ. Энэхүү баримт нь шүүхийн шийдвэрт гол нөлөө үзүүлсэн байна.

Прокуроруудын багийн ахлагч Тажул Ислам шүүхийн шийдвэрийг зарлахаас өмнө үг хэлэхдээ "энэхүү шийдвэр нь шударга ёсоор ангасан ард түмний цангааг тайлж, хүмүүнлэг ёсны эсрэг гэмт хэргийг зогсооно" хэмээн найдаж байгаагаа илэрхийлжээ.

Хасинагийн засаглал дууссаны дараа Бангладешт улс төрийн байдал улам хурцаджээ. Тус улсын сонгуулийн кампанит ажил хүчирхийлэл гаарсан эмзэг, хурцадмал нөхцөлд явагдаж байна. Шүүхийн байрны эргэн тойронд аюулгүй байдлыг чангатгаж, хуягт машинууд шалган нэвтрүүлэх цэгүүдийг хааж, нийслэл Дакка даяар олон мянган цагдаагийн албан хаагчийг байрлуулсан байна.

Сүүлийн сарын турш Дакка хотод гар хийцийн бөмбөг дэлбэрч, жагсагчид түр Ерөнхий сайд Мухаммед Юнустэй холбоотой барилга байгууламжууд, мөн автобус, христийн шашны газрууд руу шатамхай бодис бүхий лонхнууд шиджээ. 

Эх сурвалж: DW