Амьжиргааны зардлыг нь өөрсдөөр нь төлүүлэхийн тулд хууль бус цагаачдын гоёл чимэглэлийн зүйлс болон бусад үнэт эдлэлийг Их Британийн эрх баригчид хураан авахаар төлөвлөж байгаа тухай Файнэншл Таймс сонинд бичсэнийг Kazinform агентлаг эш татан мэдээлжээ.

Өөрөөр хэлбэл, тодорхой хэмжээний хөрөнгө мөнгөтэй цагаачид өөрсдийнх нь төлөө гаргаж буй зардлын зарим хэсгийг төлөх ёстой гэсэн зарчмын үүднээс ийм арга хэмжээг авч магадгүй байна.

Их Британийн Дотоод хэргийн дэд сайд Алекс Норрисын хэлснээр, уг шийдвэр нь хуримын бөгж гэх мэт зүйлсэд хамаарахгүй бөгөөд гоёл чимэглэлийн үнэт эдлэлүүдийг хил дээр хураахгүй, харин алтан бөгжөөр дүүрэн чемодантай ирж байгаа бол энэ нь огт өөр хэрэг ажээ. Цагаач этгээд улсын төсвөөс сар бүр 800 фунт стерлинг авдаг атлаа Ауди автомашин худалдан авч байгааг хүлээн зөвшөөрөхийн аргагүй гэдгийг сайд дурдлаа.

Их Британи улсад дүрвэгчдэд зориулсан цагаачлалын хууль дүрмээ чангатгаж байгаа тухай өмнө нь мэдээлсэн билээ. Шинэ хуулийн төсөлд зааснаар бол, дүрвэгчид тус улсад ирснээсээ хойш 20 жилийн дараа оршин суух эрх хүссэн өргөдөл гаргах боломжтой ажээ. Түүнчлэн тэдний статусыг 30 сар тутамд хянан хэлэлцэнэ. Эдгээр заалт нь тус улсад ачааны автомашин, завь хөлөглөн хууль бусаар нэвтэрсэн цагаачид болон визнийх нь хугацаа дууссаны дараа орогнол хүссэн өргөдөл гаргахаар төлөвлөж буй хүмүүст хамаатай. Шинэ хууль батлагдсанаар, байнга оршин суух хүсэлт гаргах хүртэлх хугацаа хамгийн урттай Европын улсуудын нэг нь Их Британи болох юм.

2005 онд лейбористуудын баталсан, одоо хэрэгжиж буй хуулиар, дүрвэгчид Их Британид 5 жил амьдарсныхаа дараа хугацаагүйгээр байнга оршин суух эрх хүссэн өргөдөл гаргах боломжтой тул тэд нийгмийн халамж үйлчилгээ, хөнгөлөлтөд хамрагдах, улмаас иргэншилтэй болох үүд хаалга нээлттэй байгаа юм.  

Эх сурвалж: KAZINFORM