Газын зурваст олон улсын цэргийн хүч байрлуулах асуудлыг тусгасан АНУ-ын Ерөнхийлөгч Дональд Трампын энхийн төлөвлөгөөний тухай тогтоолыг НҮБ-ын Аюулгүй Зөвлөл баталжээ. 

Энэхүү тогтоолыг баталснаар 20 заалт бүхий төлөвлөгөөний хоёр дахь үе шат руу шилжих боломжтой болно. Төлөвлөгөөнд Газын зурвасыг цэрэггүйжүүлэх, шилжилтийн үед тус зурвасыг удирдах байгууллагуудыг байгуулах зорилгоор Тогтвортой байдлыг хангах олон улсын хүчнийг байгуулах зэрэг заалтууд багтжээ. 

Аюулгүйн Зөвлөлийн гишүүн 15 орноос Их Британи, Франц зэрэг 13 улс тогтоолыг батлахыг дэмжсэн санал өгчээ. Харин Орос, Хятад хоёр түдгэлзсэн боловч хориг тавих эрхээ ашиглаагүй байна. 

Тогтоолд мөн Палестин улсыг байгуулах хэтийн төлөвлөгөөний талаар тусгасан нь Израилын эсэргүүцэлтэй тулгарч байгаа юм. Энэ заалтыг Арабын орнуудын шаардлагаар оруулжээ. 

Олон улсын тогтворжуулалтын хүчний бүрэлдэхүүнд олон орны цэргүүд багтана гэж АНУ-ын төлөөлөгчид мэдэгдэж байгаа боловч яг ямар улсуудын цэргүүд багтах нь тодорхойгүй байна. 

ХАМАС бүлэглэл уг тогтоолыг няцааж, Палестины ард түмний эрх ашиг, шаардлагыг хүндэтгээгүй гэж мэдэгджээ. Трампын төлөвлөгөө нь “Газын зурваст олон улсын хамгаалалтын механизмыг тулган хүлээлгэхийг оролдож байгаа бөгөөд манай ард түмэн болон түүний бүлгүүд эрс эсэргүүцэж байна» гэж “Telegram” сувагт нийтэлсэн тус хөдөлгөөний мэдэгдэлд дурдсан байна.

"Газын зурвас дотор эсэргүүцлээ илэрхийлэгчдийг зэвсэггүй болгох зэрэг олон улсын хүчинд хүлээлгэсэн үүрэг даалгавар нь төвийг сахисан байдлыг нь үгүй ​​хийж, эзлэн түрэмгийлэгчдийг дэмждэг мөргөлдөөний талбар болж хувиргаж байна" гэж ХАМАС мэдэгджээ

Тогтоолын сүүлийн хувилбарт зааснаар, Олон улсын тогтворжуулалтын хүчний гүйцэтгэх үүргүүдийн нэг нь "төрийн бус зэвсэгт бүлэглэлүүдийн зэвсгийг бүрмөсөн хураах явдал" бөгөөд үүнд ХАМАС багтаж байгаа юм. Мөн ард иргэдийг болон хүмүүнлэгийн тусламж хүргэх замыг хамгаалах үүрэгтэй.

Үүнээс гадна, олон улсын цэргийн хүчин Газын зурвастай хиллэдэг хоёр орон улс болох Израиль, Египеттэй хамтран ажиллах ёстой. Тогтоолд мөн Газад Палестины цагдаагийн байгууллагыг шинээр байгуулах тухай заалтыг оруулсан байна.

Одоог хүртэл Газын цагдаа нар ХАМАС-ын хяналтад байгаа юм.

Олон оронд террорист байгууллага гэж хориглосон ХАМАС-ын хувьд энэ нь зэвсгээ хураалгахтай адил шаардлага юм. Энэ шаардлага Трампын төлөвлөгөөнд эхнээсээ тусгагдсан байв.

Энэхүү төлөвлөгөөний эхний үе шат 10 дугаар сарын 10-нд  Израил, ХАМАС-ын хооронд гал зогсоох хэлэлцээр хүчин төгөлдөр болж, барьцаалагдсан Израилын иргэдийг палестин хоригдлуудаар солилцсоноор хэрэгжиж эхэлсэн юм. НҮБ-д суугаа АНУ-ын Байнгын төлөөлөгч Майкл Уолтц энэ үе шатыг "маш эмзэг эхний алхам" гэж тодорхойлсон байна.

Олон улсын цэргийн хүч дээр нэмэгдээд Газад олон улсын Энхийн зөвлөл байгуулах ёстой бөгөөд тус зөвлөлийг Дональд Трамп өөрөө удирдах төлөвтэй байна.

НҮБ-ын Аюулгүйн Зөвлөлийн тогтоолоор мөн Газын зурвасыг сэргээн босгох ажлыг санхүүжүүлэх механизмыг баталсан байна. Сэргээх босгох ажлыг Дэлхийн банкаар баталгаажсан тусгай итгэмжлэгдсэн сан хариуцах юм.

Эх сурвалж: BBC