Төв Азийн орнуудын төрийн тэргүүн нарын долоо дахь удаагийн зөвлөлдөх уулзалт ням гарагт Узбекистаны нийслэл Ташкент хотноо болжээ.
Уулзалтаар Төв Азийн бүс нутгийн аюулгүй байдал, тогтвортой байдал, хөгжлийн үзэл баримтлал, мөн бүс нутгийн аюулгүй байдалд учирч болзошгүй эрсдлүүд болон тэдгээрээс урьдчилан сэргийлэх арга хэмжээний 2026-2028 оны жагсаалтыг баталжээ.
“Өнөөдөр баталж буй бүс нутгийн аюулгүй байдал, тогтвортой байдлын үзэл баримтлал, мөн эрсдэл, аюул заналын жагсаалт нь энэ чиглэл дэх бидний хамтын ажиллагааны үр өгөөжийг мэдэгдэхүйц нэмэгдүүлнэ гэдэгт итгэлтэй байна” хэмээн Узбекистаны Ерөнхийлөгч Шавкат Мирзиёев мэдэгдсэн байна.
Уулзалтад оролцогчид мөн Азербайжаныг бүс нутгийн орнуудын төрийн тэргүүн нарын зөвлөлдөх уулзалтад бүрэн эрхтэйгээр оролцуулах тухай шийдвэрийг гаргажээ. Түүнчлэн 2027-2028 онд НҮБ-ын Аюулгүйн Зөвлөлийн байнгын бус гишүүнд Киргизийг нэр дэвшүүлэх тухай НҮБ-ын гишүүн орнуудад хандсан хамтарсан уриалгад гарын үсэг байна. Мөн Казахстаны Ерөнхийлөгч Касым-Жомарт Токаевыг Төв Азийн орнуудын төрийн тэргүүн нарын нэрэмжит хүндэт тэмдгээр шагнахаар шийдвэрлэжээ.
Төв Азийн орнуудын төрийн тэргүүн нарын зөвлөлдөх уулзалтыг тогтмол зохион байгуулах санаачилгыг Узбекистаны Ерөнхийлөгч 2017 оны есдүгээр сард НҮБ-ын Ерөнхий Ассамблейн 72 дугаар чуулганы үеэр дэвшүүлсэн бөгөөд анхны уулзалт 2018 оны гуравдугаар сард Казахстанд болсон бол 2019 оны 11 дүгээр сард Ташкент хотод болсон хоёр дахь уулзалтаар жилд нэг удаа зохион байгуулах журмыг баталжээ.
Эх сурвалж: RIA Novosti
