Цөмийн цэнэгт хошуу тээх чадалтай шинэ ASMPA-R пуужинг Францын Тэнгисийн цэргийн хүчний цөмийн тогтоон барих хүчний зэвсэглэлд хүлээлгэн өгсөн тухай тус улсын Батлан хамгаалах яам мэдээлжээ.
Дунд зайн тусгалтай “агаар-газар” ангиллын уг пуужинг пүрэв гарагт "Rafale" сөнөөгч онгоцноос харваж, хоёр дахь удаагаа туршсан байна.
"ASMPA-R пуужингийн энэ удаагийн туршилтыг уг пуужинг Тэнгисийн цэргийн хүчний цөмийн нисэх хүчний (FANU) зэвсэглэлд 2025 оны 11 дүгээр сарын 10-ны өдөр хүлээлгэн өгсөн тухай баримт бичигт Батлан хамгаалахын сайд болон Ахмад дайчдын асуудал эрхэлсэн сайд гарын үсэг зурсны дараа явууллаа" гэж тус яамны хэвлэлийн мэдээнд дурджээ.
Батлан хамгаалах яамны мэдээлэлд дурдсанаар, Франц улс цөмийн цэнэгт хошуу тээх чадалтай 4-р үеийн пуужин (ASN4G) болон M51.4 баллистик пуужинг 2035 он гэхэд бүтээж дуусгахаар төлөвлөж байна.
Тус яам цөмийн зэвсэг тээх чадалтай, тив алгасагч M51.3 шинэ баллистик пуужинг зэвсэглэлд хүлээлгэн өгсөн тухай өнгөрсөн сарын сүүлчээр зарласан юм. Ийм төрлийн пуужингуудыг Францын Тэнгисийн цэргийн хүчний "Triomphant" ангиллын цөмийн хөдөлгүүрт дөрвөн шумбагч онгоцонд байрлуулах ажээ.
Эх сурвалж: TASS
