Сайтар хадгалагдан үлдсэн ценагнатид төрлийн үлэг гүрвэлийн араг ясыг “Christie’s” дуудлага худалдааны ордон худалдахаар болжээ. Эрдэмтдийн хэлснээр энэ төрлийн амьтан нь шинжлэх ухаанд тодорхойлогдоод буй үлэг гүрвэлүүдийн хамгийн сүүлчийн төлөөлөгчдийн нэг юм гэж The Telegraph сонин мэдээлэв.

Археологичид “Спайк” хэмээн нэрлэсэн энэ үлэг гүрвэлийн 100 орчим ясыг олж илрүүлснээр араг ясыг нь бараг бүрэн сэргээн бүрдүүлжээ. Тэрбээр гадаад төрхөөрөө тахиа болон орчин үеийн тэмээн хяруул шувууг санагдуулах бөгөөд толгой дээрээ залаатай, урт хөлтэй, урд мөчдөө хурц хумстай, олзоо шүүрч авахад тохиромжтой эрүүтэй байжээ. Биеийн өндөр нь дундаж хүнийхтэй дүйцэхүйц байсан аж.

Эрдэмтдийн таамаглаж буйгаар ийм төрлийн үлэг гүрвэлүүд өдөөр хучигдсан бөгөөд махчин амьтдаас зугтахын тулд өндөр хурдтай байсан бололтой. Тэд янз бүрийн өвс ногоо, жижиг мэрэгчид, нялцгай биетэн, бусад үлэг гүрвэлийн өндөг, мөн ургамлын үр, самар, жимсээр хооллодог байжээ.

“Спайк”-ийн дуудлага худалдаа энэ оны арванхоёрдугаар сарын 11-нд болох бөгөөд түүнээс өмнө олон нийтэд хэд хоногийн турш дэлгэн үзүүлэх юм. “Christie’s”-ийн төлөөлөгчид энэ дуудлага худалдааг ихээхэн сонирхож буй тул үнэ нь 4 сая ам.долларын үнэлгээнээс давна гэж таамаглаж байгаа юм байна.

Өнгөрсөн долдугаар сард тус ордон цератозаврын араг ясыг 4–6 сая ам.доллараар үнэлэн худалдаанд тавьсан бөгөөд ердөө зургаахан минутын дотор 30.5 сая ам.доллараар зарагдсан билээ.