АНУ-ын агаарын тээврийн компаниуд ням гарагт 2100 гаруй нислэгийг цуцалжээ. Засгийн газрын үйл ажиллагааны түр зогсолт /шатдаун/ Талархлын баярын ачаалал ихтэй өдрүүд хүртэл үргэлжилбэл улс даяар агаарын тээврийн хөдөлгөөн саатаж болзошгүй гэж Тээврийн сайд Шон Даффи анхааруулсан байна. 

Америкийн хамгийн их ачаалалтай 40 нисэх онгоцны буудлын нислэгийг цөөлөх шийдвэр ням гарагт гурав дахь өдрөө хэрэгжиж байгаа бөгөөд уг шийдвэрээс үүдэлтэй саатал улам бүр нэмэгдэх болжээ. Ойролцоогоор сар орчмын турш цалингүй байсан зарим агаарын хөдөлгөөний хянагч ажилдаа ирэхээ больсонтой холбоотойгоор Нисэхийн удирдах газар /FAA/ өнгөрсөн долоо хоногт улсын хамгийн ачаалал ихтэй нисэх буудлуудын нислэгийг цөөрүүлэх тушаал гаргасан юм.

Түүнчлэн агаарын тээврийн хөдөлгөөний саатлыг хянадаг “FlightAware” цахим хуудасны мэдээллээр, зөвхөн ням гарагт л гэхэд 7000 орчим нислэг саатсан байна. Харин баасан гарагт 1000 гаруй, бямба гарагт 1500 гаруй нислэг тус тус цуцлагджээ. FAA-ын нислэгийг цөөлөх хувь хэмжээ баасан гарагт 4 хувиар эхэлсэн бөгөөд 11 дүгээр сарын 14 гэхэд 10 хувь хүрч нэмэгдэнэ. Орон нутгийн цагаар өглөөний 6 цагаас оройн 10 цаг хүртэл хүчинтэй уг шийдвэр нь агаарын тээврийн бүх компанид нөлөөлөх юм. 

Атланта хот дахь “Хартсфилд-Жексон” олон улсын нисэх онгоцны буудалд ням гарагт хамгийн олон буюу 570 гаруй нислэг цуцлагдсан бол Нью-Жерси муж улсын “Ньюарк Либерти” олон улсын нисэх онгоцны буудалд 265 нислэг цуцлагдсан байна. Жоржиа муж улсад цаг агаарын байдал мөн нислэгт нөлөөлж болзошгүй байгаа бөгөөд Атланта дахь Үндэсний цаг уурын албаны газраас мягмар гараг хүртэл ихэнх нутгаар хүйтний эрч чангарна гэдгийг анхааруулсан байна.

10 дугаар сарын 1-нээс 11 дүгээр сарын 7-ны хооронд агаарын хөдөлгөөнийг хянагч мэргэжилтнүүд дутагдсаны улмаас 4 сая гаруй зорчигч саатсан гэж “Airlines for America” холбооноос мэдээлжээ.

Эх сурвалж: AP