Европын холбоо /ЕХ/ Оросын эсрэг 20 дахь удаагийн хоригийн багцыг боловсруулахаар бэлтгэлээ эхлүүлжээ гэж DW мэдээллээ. Энэ талаар Литва улсын Сангийн сайд Криступас Вайтекунас болон Европын комиссын Санхүүгийн үйлчилгээ, Хадгаламж-хөрөнгө оруулалтын асуудал эрхэлсэн комиссар Мария Луиш Альбукерке нар хэлэлцсэн байна.
Литвийн Сангийн сайд “ЕХ зөвхөн Орост төдийгүй Беларусийн эсрэг дарамтаа үргэлжлүүлэн нэмэгдүүлэх ёстой. Оросын эрчим хүч, санхүүгийн салбарт шахалт үзүүлэх шинэ арга хэмжээ авах цаг ирлээ” гэж мэдэгджээ. Түүний хэлснээр, шинэ хоригийн хэлэлцүүлэг эхэлсэн бөгөөд Беларусийн эсрэг хоригийг Оросын арга хэмжээнүүдтэй уялдуулан хэрэгжүүлэх шаардлагатай байна.
Европын комиссар Мария Луиш Альбукерке “Бид гуравдагч орнуудтай хамтран ажиллаж байгаа бөгөөд хоригоос зайлсхийхэд дэмжлэг үзүүлж буй улс орнууд ч бий” хэмээн онцолсон байна.
ЕХ хамгийн сүүлийн буюу 19 дэх хоригийн багцыг энэ оны аравдугаар сарын 23-нд баталсан бөгөөд үүнд 2027 оноос эхлэн Оросын шингэрүүлсэн хийг худалдан авахыг зогсоох, Оросын “сүүдрийн флот”-ын 117 хөлөг онгоцонд хориг тавих, мөн Оросын дипломат ажилтнуудын зорчих эрхийг хязгаарлах зэрэг арга хэмжээ багтжээ.
Харин Оросын тал эдгээр хоригийг “хууль бус” гэж үзэж байгаа бөгөөд Ерөнхийлөгчийн хэвлэлийн төлөөлөгч Дмитрий Песков “Оросын эдийн засаг олон улсын хоригт дархлаажсан” хэмээн мэдэгдсэн байна.

Эх сурвалж: DW.